VOV4.Jarai - Ƀrô bơyan čơkă thun phrâo tui gru grua Chôl Chnăm Thmây thun 2022, pơ ala brơi Jơnum min djop djuai ania mơnuih mơnam Việt Nam, Khul apăn bruă Ping gah, Khua Jơnum min djop djuai ania mơnuih mơnam Việt Nam ơi Đỗ Văn Chiến mơ-it tơlơi pơpŭ ƀing ơi yơng yă phơ̆t hăng mơnuih djuai anai Khmer. Amăng hră mơ-it, ơi Đỗ Văn Chiến mơ-it kơ ƀing ơi yơng yă phơ̆t hăng mơnuih djuai anai Khmer amăng đơ đam dêh čar hơdôm tơlơi tơña bla, pơpŭ thun phrâo hiam drơi jăn pran jua, tơphă, hăng bưp lu tơlơi hiam klă. Čơkă thun phrâo Chôl Chnăm Thmây 2022, ơi Đỗ Văn Chiến čang rơmang ƀing ơi yơng yă phơ̆t hăng mơnuih djuai ania Khmer tŏ tui djă pioh gru grua hiam klă mơng djuai ania, pran gum pơgôp hrŏm hăng Ping gah, ling tơhan, abih bang mơnuih bon sang pơtrut bruă pơplông khăp kơ lŏn ia, gir run ngă pơgiong hơdôm hơnong pơkă pơđĭ kyar bơwih ƀong huă, mơnuih mơnam hơmâo gơnong glông, gong gai ƀon lan; đing nao ngă klă hơdôm hơdră pơgang klin, pơhlôm brơi tơlơi suaih prak kơ mơnuih ƀon sang, gum tơngan hrŏm ngă tŭ yua hơdôm hơdră bruă djuai anai mơng Ping gah hăng Kơnuk kơna, biă mă nu lĕ akŏ bruă hăng Jơlan hơdră tui hơnong pơkă dêh čar amăng pơđĭ kyar bơwih ƀong huă-mơnuih mơnam ƀơi kual mơnuih djuai ania ƀiă hăng kual ataih, asuek rơwang thun 2021-2030; hrŏm hăng anun kiăng gir run djă pioh, lăi pơthâo gru grua hiam mơng djuai ania Khmer, mut hrŏm amăng gru grua djuai ania Việt Nam yôm phara.

Siu Đoan: Pơblang