VOV4.Jarai-Tlam lơ 4/4, Grup hyu mă bruă mơ̆ng Gơnong dlông yua kơ ơi Y Thanh Hà Niê Kdăm, Khua Jơnum min djuai ania gah anom bruă pơ ala mơnuih ƀôn sang dêh čar nao čuă hăng bơni hơ-ơč hrơi ngă yang thun phrâo Chol Chnăm Thmei mơ̆ng djuai ania Khmer ƀơi pra yang SomRong, phường 5, plơi prong Sóc Trăng. Ơi Y Thanh Hà Niê Kdăm, Khua Jơnum min djuai ania gah anom bruă pơ ala mơnuih ƀôn sang dêh čar pơdah pran jua hok mơak dưi nao čuă ƀing khua ơi yơng yă phơt pơ pran yang SomRong.

Grup hyu mă bruă mơ̆ng Jơnum min djuai ania gah anom bruă pơ ala mơnuih ƀôn sang dêh čar nao čuă, bơni hơ-ơč

hrơi ngă yang thun phrâo gah djuai ania Khmer

Ƀrô djơ̆ tal ngă yang Chol Chnăm Thmei hlăk truh, Khua Jơnum min djuai ania hơmâo mơ-it hiăp pơpŭ, bơni hơ-ơč kơ abih bang ƀing ơi phơt yă yơng ƀơi pra yang SomRong hơdor hrơi ngă yang thun phrâo gah djuai ania Khmer hăng tơlơi pơpŭ hiam drơi jăn laih anun rơnuk rơnua. Laih dơ̆ng čang rơmang lĕ, hrơi blan pơ anăp adih, khua mua git gai wai lăng pra yăng anai ăt pơtrut ană plơi, ƀing djru đăo yơng ngă tui djơ̆ jơlan hơdră, tơlơi pơtrun mơ̆ng ping gah, tơlơi phiăn kơnuk kơna, man pơdong plơi pla ala ƀôn Sóc Trăng jai hrơi pơdrong asah, hiam klă, djru hrom bruă gum pơgôp djuai ania kơ lŏn ia ta.

Nay Jek: Pơblang