VOV4.Jarai - Mơguah lơ 29/3, Jơnum min mơnuih ƀôn sang tơring čar Daklak pơphun jơlan hơdră pơtom hiăp hăng hlăk ai kơ anăn păn “Hlăk ai tơring čar Daklak pơphun bruă, pơdŏng bruă”. Amăng mông bơkơtuai, ƀing hlăk ai hmâo lăi laih lu tơlơi kơ hơdră bruă gum djru, hơdră pơkă pioh kơ hlăk ai lom pơphun bruă mă, pơdŏng bruă mă.

Lu bôh yôm dưi hmâo khua git gai hơdôm gơnong bruă, anom bruă lăi glăi ƀơi anăp amăng mông bơkơtuai

Bôh yôm đing nao prăk čan, bruă mă, pơtô bruă mă, ba mơnuih nao mă bruă pơ̆ dêh čar tač rơngiao, pơtô bruă mă kơ mơnuih mă bruă ƀơi plơi pla; Hơdôm hơdră pơkă, hơdră bruă pơtrut pran jua kiăng pơđĭ kyar bơwih ƀong amăng khul hlăk ai, biă ñu tơdăm dra hlăk ai djuai ania ƀiă, ƀu klă drơi jăn... Amăng mông bơkơtuai, hrom hăng hơdôm tơlơi gum pơhiăp, rơkâo đĭ dưi hmâo bơkơtuai ƀơi anăp hăng tơdăm dra, yă H’ Yim Kđoh, Kơ-iăng Khua Jơnum min mơnuih ƀôn sang tơring čar Daklak rơkâo hơdôm gơnong bruă, anom bruă hmâo dong hơdôm tơlơi kơsem min, lăi glăi hăng hră pơ-ar hơdôm bôh yôm dô̆ glăi hlâo kơ lơ 10/4 pơ̆ anăp./.

Siu H’ Prăk: Pơblang