VOV4.Jarai - Hăng abih bang kual lŏn ngă đang hmua rơbêh kơ 500.000 ektar hăng pŭ hlô đĭ truh rơbêh kơ 700.000 drơi, hrom hăng hơdôm anô̆ gal gah ayuh hyiăng, lŏn dron, Gialai hmâo laih lu tơlơi gal pioh pơđĭ kyar bruă đang hmua. Bruă đang hmua ăt lĕ gơnong bruă glăk dưi hmâo tơring čar Gailai ngă gal brơi lu kiăng pơhư̆č tuh pơplai. Ƀơi mông Jơnum pơtrut tuh pơplai thun 2022 tơring čar Gialai phrâo pơphun amăng lơ 21/5 phrâo rơgao, ơi Võ Ngọc Thành – Khua Jơnum min mơnuih ƀôn sang tơring čar Gialai pơsit: Tơring čar pok laih jơlan ngă pơhư̆č anom bơwih ƀong tuh pơplai kơ bruă đang hmua. Pô hyu mă tơlơi pơhing phrâo Gong phun jua pơhiăp dêh čar Việt Nam hmâo tơlơi tơña kơ ơi Võ Ngọc Thành – Khua Jơnum min mơnuih ƀôn sang tơring čar Gialai kơ bôh yôm anai.

-Ơ ơi, hơdôm hrơi rơgao, tơring čar hmâo hơdôm bôh than hơget amăng ngă pơhư̆č tuh pơplai kơ bruă đang hmua?

Ơi Võ Ngọc Thành: Hăng tơhnal gal prong gah lŏn drŏn, ayuh hyiăng, hơdôm thun rơgao, hăng hơdôm hơdră bruă anăp nao kơ pơđĭ kyar bruă đang hmua tui hơdră phrâo, bruă măi mok pơkra gơnam mă mơng đang hmua lĕ, Gialai hmâo laih tơlơi pơplih jơlan gah prong ngă pơhư̆č tơlơi đing nao mơng ƀing tuh pơplai hăng hơdôm grŭp bơwih ƀong prong kơsem min, hơduah ĕp hăng gum hrom tuh pơplai. Hmâo sa dua grŭp prong, anom bơwih ƀong prong kah hăng Doveco, Trường Hải, Hoàng Anh Gialai ăt glăk đing nao mơn hơdôm bruă tuh pơ plai kơ bruă đang hmua. Sa dua bôh anom hmâo pơphun hăng pok pơhai hơdôm hơdră ngă đang hmua ƀing gơmơi lăi lĕ truh kih biă, hmâo pơjing laih pran ngă pơhưč prong biă hăng ƀing tuh pơplai pơkon; hrom hăng anun pơjing tơlơi pơplih phun amăng bruă pơplih hơdră phun pla mơng tơring čar hăng pơjing kual phun pla hơbit. Amăng anun hmâo jing laih tơlơi pơlir hơbit amăng pơphun pla, pơkra, sĭ mơdrô gơnam tam, ngă brơi bruă ngă đang hmua tơring čar Gialai yak blung a hmâo sa tơlơi pơplih prong. Pơhrui glăi mơng mơnuih amăng grŭp, mơng mơnuih ƀôn sang dưi đĭ lu tui; ƀô̆ mơta plơi pla dưi pơplih phrâo sa yak, djru lăp yap ba kơ bruă pơjing pơdŏng plơi pla phrâo ƀơi hơdôm anih anom mơng tơring čar.

-Hơdôm hrơi rơgao, Ping gah tơring čar hăng Jơnum min mơnuih ƀôn sang tơring čar Gialai hmâo hơdôm tơlơi gal hơget pioh ngă pơhư̆č anom bơwih ƀong prong, anom bơwih ƀong dêh čar tač rơngiao tuh pơplai kơ bruă đang hmua, ơ ơi?

Ơi Võ Ngọc Thành – Khua Jơnum min mơnuih ƀôn sang tơring čar Gialai

Ơi Võ Ngọc Thành: Tơlơi pơtrun pơsit Ping gah tơring čar tal 14 hmâo ba tơbiă 4 črăn bruă mă hăng tơdơi anai pơhrua nao dong sa jơlan hơdră bruă mă dong lĕ 5 črăn bruă mă. Ƀing gơmơi lăi anai lĕ hơdôm jơlan gah pơsit phun pioh pơtrut kơ bruă pơđĭ kyar hăng ăt lĕ tơhnal pioh Jơnum min mơnuih ƀôn sang tơring čar Gialai pơdŏng hơdôm kơčăo bruă hăng jơlan hơdră ngă bruă pioh ngă tui tơlơi pơtrun pơsit anai. Tơlơi pơtrun pơsit tal sa kơ pơdŏng ngăn rơnoh, mơnuih mă bruă hăng glông bruă kơđi čar ƀơi hơdôm gưl kiăng djơ̆ hăng tơlơi rơkâo bruă mă phrâo. Tơlơi pơtrun pơsit tal dua kơ pơdŏng anom mă yua ha amăng plĕ kiăng djru kơ bruă pơđĭ kyar bơwih ƀong huă. Tơlơi pơtrun pơsit tal tlâo kơ pơtrut kơtang ngă pơhư̆č hơdôm ngăn rơnoh tuh pơplai kơ hơdôm bruă mă kah hăng bruă đang hmua tui hơdră phrâo, măi mok pơkra, apui yua pơkra glăi hăng tuai čuă ngui truh thun 2030 (Tơlơi pơtrun pơsit mrô 07 lơ 20/2/2022). Tơlơi pơtrun pơsit tal 4 kơ pơđĭ kyar hơdjă, bruă wai lăng pơgang hăng pơlar dlai klô hăng pơjing bruă bơwih ƀong kơ mơnuih ƀôn sang ƀơi rơgôp tơ-ui kyâu dlai. Hăng tơlơi pơtrun pơsit tal 5 phrâo mă yua kơ pơplih mrô. Ră anai, tơring čar mă yua sa dua jơlan hơdră ngă bruă, hluai tui anun amra pơdŏng sa dua hơdră bruă djơ̆ hăng tuh pơplai, pơđĭ kyar ăt kah hăng hơdôm hơdră bruă kiăng iâu pơthưr hơdôm ngăn rơnoh tuh pơplai kiăng ngă hiưm hơpă pơjing brơi gêh gal hloh kơ pô tuh pơplai nao hăng dô̆ glăi tuh pơplai ƀơi tơring čar.

-Kiăng gơnong bruă đang hmua ƀơi Dăp Kơdư, amăng anun hmâo bruă đang hmua tơring čar Gialai pơđĭ kyar lăp djơ̆ hăng anô̆ gal hmâo hơđăp, tơring čar čang rơmang, rơkâo tơlơi hơget hăng kơnuk kơna dêh čar, ơ ơi?

Kơ phê lĕ sa amăng hơdôm gơnam mă mơng đang hmua phun ƀơi tơring čar Gialai

Ơi Võ Ngọc Thành: Kâo pơmin pơplih bruă pla hơdôm djuai phun pla mơng kual Dơnung Yŭ dêh čar rai pơ̆ Dăp Kơdư amra jing jơlan gah pơgi kơdih anai. Samơ̆ ngă hiưm hơpă pioh ƀing ta nao jơlan giăm, čơkă phun lĕ hơdôm bôh tơring čar ăt glăk kơsem min mơn jơlan nao mơng pô hluai tui pơlir hơbit kual. Kâo pơmin, pơ̆ anăp anai, Ding jum kơđi čar glăk prăp lui klah čun tơlơi pơtrun pơsit mrô 10 hăng mrô 12 mơng Ding jum kơđi čar, hrom hăng anun pơdŏng hơdră pơđĭ kyar mơng kual Dăp Kơdư. Kâo čang rơmang Tơlơi pơtrun pơsit anai amra pơjing rai tơlơi pơplih phrâo, ƀing gơmơi amra kơsem min, gum hrom sa hơdră djop tum ƀơi Tơlơi pơtrun pơsit anai. Ngă hiưm hơpă kiăng Dăp Kơdư hmâo tơlơi pơplih đĭ kyar kơjăp phik hăng kơtang hloh pơ̆ anăp anai, kiăng mă yua hơdôm anô̆ gal mơ̆ Dăp Kơdư hmâo. Dua lĕ khom hmâo hơdră pha ra kơ kual Dăp Kơdư ăt kah hăng phrâo tom adih anai phrâo mă yua hăng kual Dơnung Yŭ dêh čar amra pơtlaih kơ Dăp Kơdư pioh pơđĭ kyar.

-Hai, bơni kơ ih hŏ!./.

Nguyễn Thảo, Hoàng Quy (VOV Tây Nguyên): Čih – Siu H’ Prăk: Pơblang