VOV4.Jarai - Mơguah lơ 28/7, ơi Võ Văn Thưởng, Ding kơna Ding jum kơđi čar, Khua gum bruă Ping gah dêh čar hăng grup hyu mă bruă gơnong glông hơmâo mông mă bruă hăng Khul apăn bruă Ping gah tơring čar Bình Định. Tui hră lăi pơthâo 2 thun laih rơgao, tơring čar Bình Định hơmâo đing nao pơphun kơsem min, pơtô pơkrăm, hruă kjăp, pơtô pơblang hăng pok pơhai ngă tui tơlơi pơtrun mơng Jơnum Ping gah đơ đam dêh čar tal XIII.

Khua gum bruă git gai Ping gah dêh čar ơi Võ Văn Thưởng mă bruă ƀơi Bình Định

Đơ đam tơring čar hơmâo pơphun 507 anih hruă kjăp, pơtô hrăm, pok pơhai ngă tui tơlơi pơtrun hăng rơbêh 65 rơbâo čô mơnuih apăn bruă Ping gah mut hrŏm, dưm dưm rơbêh 98%. Amăng mông mă bruă, ơi Võ Văn Thưởng, Ding kơna Ding jum kơđi čar, Khua khul apăn bruă Ping gah dêh čar rơkâo, pơ anăp anai Bình Định tŏ tui đing nao hruă kjăp, ngă tui hơdôm tơlơi pơtrun, tơlơi klah čun, tơlơi črâo trun mơng Ping gah, sit biă ñu hơdôm tơlơi pơtrun dong mơng hrơi Jơnum Ping gah đơ đam dêh čar tal XIII truh ră anai, amăng anun kơtưn bruă wai lăng mơnuih apăn bruă Ping gah amăng tơring čar.

Siu Đoan: Pơblang