Pơhiăp ƀơi mông jơnum, Khua mir sir ơi Nguyễn Xuân Phúc lăi rơđah, amăng sa thun mơkrah čih pơkra kơčăo bruă, Khul git gai hăng Grup čih dăp kơčăo bruă hơmâo gir run hăng ngă giong bruă mă jao lu biă mă. ƀuh rơđah lĕ hơmâo pơtum lu sang bruă ƀơi gơnong dlông čih pơkra 27 mơta tơlơi pơƀut mă; pơphun klâo wơ̆t jơnum prong bơkơtuai ĕp boh thâo djơ̆ gưl dêh čar, 15 wơ̆t jơnum, pơčrông sai dơlăm hăng klâo wơ̆t jơnum pơgôp hiăp mơ̆ng khua mua ping gah tơring čar, ƀôn prong; jak iâu lu mơnuih rơgơi kơhnâo, ƀing nai tha prin, prin tha, mơnuih apăn bruă hơmâo ngă bruă sit nik, ƀing kơsem min mơ̆ng djop sang hră gưl prong amăng dêh čar.

Khua mir sir lăi pơtong, Hră pơtrun kơ bruă “Ăt akŏ pơdong hăng ngă pơgiong Kơnuk kơna tơlơi phiăn git gai mơnuih mơnam bơkơnar ƀơi Việt Nam rơnuk phrâo” jing gơnam yôm mơ̆ng ia rơgơi tơlơi pơmin lu mơnuih, khul tơpuôl ngă hrom hăng pơyơr pran jua tơpă sit nik mơ̆ng ƀing mơnuih kơhnâo čih pơkra. Khua mir sir rơkâo, khom pơtrut pơtô pơblang, hơmâo akŏ bruă tum teč pok pơhai ngă tui tơdơi kơ pơtô ngă tui Hră pơtrun hơmâo pok pơhai lơ̆m jơnum đơ đam dêh čar kơsem min, hrăm tui, pơtô brơi ngă tui djop hră pơtrun jơnum lok 6 ping gah tal XIII.