VOV4.Jarai - Ƀrô tal hơdor glăi 47 thun hrơi blah dưi lơ 30/4, Khua mir sir ơi Nguyễn Xuân Phúc bưp ƀing čơđai mơng kual Dơnung glăk hrăm hră pơ kual Kơdư ƀơi Sang jơnum Thống Nhất (ƀôn prong Hồ Chí Minh). Tŏ tui gru grua hing ang mơng djop rơnuk čơđai hrăm hră mơng kual Dơnung đưm đă ră hlâo, ƀing čơđai mơng kual Dơnung tơdơi anai ƀu pơdơi gir run, hơmâo Ping gah đăo gơnang, hơmâo mơnuih ƀon sang khăp pap. Hơdôm pluh čô khua mua hơđăp lĕ Ding kơna amăng Khul apăn bruă Ping gah lĕ ƀing khua mua ngă bruă amăng djop ding jum, gơnong bruă. Sit biă ñu, amăng rơnuk pơplih phrâo djop mơta amăng dêh čar, lu mơnuih thâo rơgơi hơmâo gum pơgôp prong prin amăng pơđĭ kyar bơwih ƀong huă, ngă pơdrong asah brơi kơ lŏn ia ta. Khua mir sir ơi Nguyễn Xuân Phúc pơsit tong, djop rơnuk čơđai hrăm hră kual Dơnung mah mă bruă hơget, pơpă tŭ mơn lêng kơ đăo gơnang kơ Ping gah, hăng lŏn ia, hơdor na nao bruă mă mơng Ping gah, mơng Wa Hô hăng djă pioh na nao amăng pran jua hơdôm tơlơi gum pơgôp, tuh rơyuh pran jua, tơlơi gum djru mơng mơnuih ƀon sang kual Kơdư.

Siu Đoan: Pơblang