VOV4.Jarai - Ƀrô hrơi gru grua djop djuai ania Việt Nam (19/4), mơguah lơ 19/4, ƀơi Ƀirô mă bruă, Khua mir sir ơi Nguyễn Xuân Phúc bưp ƀô̆ mơta ƀing khua pơ ala mơnuih ƀon sang hơmâo 92 čô tha plơi, khua plơi, ƀing kơhnâo kơhnăk djuai ania ƀiă hơmâo lu tơlơi gum pơgôp amăng bruă djă pioh, lăi pơthâo gru grua djop djuai ania. Đĭ pơhiăp amăng mông bưp, Khua mir sir ơi Nguyễn Xuân Phúc pơsit tong kơ bruă bơwih brơi tơlơi hơdip mơda kơ mơnuih djuai ania ƀiă jai hrơi hơmâo tơlơi đing nao hăng pơplih tong ten, sit biă ñu lĕ hơdôm akŏ bruă, hơdră bruă djă pioh hăng lăi pơthâo gru grua mơng djop djuai ania, lăng gru grua djop djuai ania lĕ ha bơnah ƀu dưi pơčlah ôh mơng gru grua djuai ania Việt Nam.

Khua mir sir čang rơmang ƀing tha plơi, khua plơi, ƀing kơhnâo kơhnăk, mơnuih arăng đăo gơnang tŏ tui ba gru hiam kơ ană tơčô hăng abih bang mơnuih ƀon sang; lĕ ƀing mơnuih ba jơlan hlâo amăng bruă ƀơi ƀon lan, tŏ tui pơtrut pơsur ană plơi pla djă pioh gru grua yôm, gơgrong hơjăn, thâo gum pơgôp mơng djop djuai ania. Yua tui Khua mir sir, hluai tui bruă pơlir amăng gru grua, mơng anun ngă tơlơi hơdip jê̆ giăm, thâo hluh hăng khăp pap tơdruă, pơgôp pran kơtang amăng dêh čar Việt Nam, tơlơi yôm mơng Việt Nam brơi kơ ră anai hăng pơgi kơdih dong.

Siu Đoan: Pơblang