VOV4.Jarai - Mơguah lơ 17/5, ƀơi sang bruă Khua mir sir, Khua mir sir ơi Nguyễn Xuân Phúc bưp khua mua arăng đăo gơnang amăng mơnuih ƀon sang djuai ƀiă tơring čar Tuyên Quang. Ƀơi mông bưp, Khua mir sir pơsit, Ping gah, Kơnuk kơna lêng lăng yôm bruă wai lăng djuai ania jing bruă yôm phun kiăng ngă na nao amăng bruă hơkrŭ dêh čar ta, hơmâo pok pơhai lu jơlan hơdră prong pơđĭ kyar bơwih ƀong huă - gru grua - mơnuih mơnam, pơhlôm rơnuk rơnua kual mơnuih ƀon sang djuai ƀiă hăng kual čư̆ siăng kriăng pơtâo, đah mơng pơplih tui tơlơi hơdip mơnuih ƀon sang djuai ƀiă hăng gir ngă anet tui tơlơi pleh ploh kơplah wah kual čư̆ siăng hăng kual dơnung.

Hrơi blan pơ anăp, Khua mir sir ơi Nguyễn Xuân Phúc kiăng hơdôm ding jum, anom bruă, amăng anun hơmâo tơring čar Tuyên Quang pơsir hĭ hơdôm tơlơi aka ƀu djơ̆, pơhrua tui, ngă pơgiong jơlan hơdră djru, pơđĭ tui hloh tơlơi gơgrong bruă mơng ƀing hơmâo ană plơi pla djuai ƀiă gơnang, gum ngă tŭ yua bruă wai lăng djuai ania mơng Ping gah hăng jơlan hơdră djuai ania mơng Kơnuk kơna ră anai.

Siu H’Mai: Pơblang