VOV4.Jarai - Mơguah lơ 16/5, ƀơi anih mă bruă Khua mir sir dêh čar, Khua mir sir dêh čar ta ơi Nguyễn Xuân Phúc hmâo git gai mông ngă lơphet čơkă Khua mir sir dêh čar Grek yă Katerina Sakellaropoulou pơphun rai čuă dêh čar Việt Nam mơng lơ 15 truh lơ 19/5 tui tơlơi jak iâu mơng Ding kơna Ding jum kơđi čar, Khua mir sir dêh čar ta ơi Nguyễn Xuân Phúc. Tơdơi kơ mông ngă lơphet čơkă, dua gơñu amra pơphun bơkơtuai.

Amăng rơwang tal rai čuă, Khua mir sir dêh čar Grek hmâo dưm laih guang bơnga ƀơi Gŏng kut hơdor kơ ƀing ling tơhan pơsăn drơi; dưm guang bơnga hăng mut čuă pơsăt jep Khua mir sir Hồ Chí Minh; lăi pơthâo ră ruai hăng Khua git gai Ping gah dêh čar ơi Nguyễn Phú Trọng; bơkơtuai hăng Khua git gai wai lăng pơ ala mơnuih ƀôn sang dêh čar ta ơi Vương Đình Huệ; nao pơhmư̆ mông ngă Lơphet kĭ pơkôl hră pơ-ar hăng bưp mơnuih čih tơlơi pơhing phrâo; čuă lăng Văn Miếu hăng nao pơhmư̆ sa dua bruă jơnum ƀơi plơi pla. Tal rai čuă djru hơkrŭ đĭ pran đăo gơnang bruă kơđi čar, ngă dơlăm hloh dong tơlơi rô nao rai gum hrom lu mơta kah hăng bruă kơđi čar – pơtom hiăp, bơwih ƀong, bôh thâo, tuai čuă ngui ngă brơi tơlơi rô nao rai dua bơnah sit nik, ba glăi bôh tơhnal hloh./.

Siu H’ Prăk: Pơblang