VOV4.Jarai - Mơguah lơ 7/2, ƀơi tơring čar Hà Nam, Khua mir sir dêh čar ta ơi Nguyễn Xuân Phúc nao pơhmư̆ mông ngă Lơhet pơphun Rơwang bruă črăn II (rơwang 2) gah Rơwang bruă tuh pơplai pơkra jơlan tô jơlan đuăi hmar Hà Nội – Hải Phòng hăng jơlan đuăi hmar Cầu Giẽ - Ninh Bình. Rơwang bruă črăn II (rơwang 2) hmâo abih bang prăk tuh pơplai 702,82 klai prăk, ataih 16,3km, yua Gơnong bruă wai lăng bruă dŭ pơgiăng jơlan nao rai tơring čar Hà Nam ngă pô tuh pơplai, pô gơgrong pơdŏng lĕ anom bơwih ƀong man pơdŏng Xuân Trường.

Hơdôm hrơi ngă giong rơwang bruă thun 2023. Pơhiăp amăng mông pơphun pơkra, Khua mir sir dêh čar ta ơi Nguyễn Xuân Phúc lăi rơđah tơhnal yôm phăn mơng jơlan đuăi hmar tô nao rai anai, ƀu djơ̆ kơnong kơ djru hrŏ trun rơnoh rô nao rai kơ kual krah ƀôn prong Hà Nội ôh mơ̆ ñŭ dô̆ pơđĭ tui bôh tŭ yua tô nao rai jơlan glông, ngă pơhư̆č tuh pơplai hăng pơhư prong bruă pơđĭ kyar sĭ mơdrô, tuai čuă ngui, ƀôn prong mơng kual lŏn dăo ia krông Bắc bộ. Khua mir sir dêh čar ta rơkâo Ding jum wai lăng bruă dŭ pơgiăng jơlan nao rai dêh čar ta, tơring čar Hà Nam, Pô tuh pơplai khom thâo djop bruă gơgrong pioh kơ rơwang bruă, ngă djơ̆ rơnoh bruă, pơhlôm klă hăng ba glăi bôh tơhnal ring bruă, pơgăn tơlơi ƀu klă, hưp ƀong kông ngăn amăng tuh pơplai, man pơdŏng./.

Siu H’ Prăk: Pơblang