VOV4.Jarai - Čơtlăm lơ 2/8, Khua mir sir dêh čar ơi Nguyễn Xuân Phúc mă bruă hăng Khua tơring čar Đồng Nai. Tơdơi kơ khua mua hơdôm ding jum, gơnong bruă gum pơhiăp, đĭ pơhiăp amăng mông mă bruă, Khua mir sir dêh čar ơi Nguyễn Xuân Phúc lăi rơđah bruă mă mơng Đồng Nai hăng lăi bruă pơplih phrâo măi mok, pơphil phrâo lŏn ia ta amra kaih tơdah ƀu hmâo pran pơtrut ba jơlan hlâo mơng Đồng Nai hăng sa dua anih anom amăng kual bơwih ƀong phun gah Dơnung.

Khua mir sir rơkâo Đồng Nai khom ĕp pran pơtrut, hơdră pơđĭ kyar phrâo, yua kơ tơdah hluai tui kơ tơlơi juăt mơng hlâo, amra ƀu dưi pơplih phrâo hăng čung ba đĭ kyar kual ôh. Tơring čar khom ba bruă bơwih ƀong mơnuih ƀôn sang amăng lŏn ia hăng bơwih ƀong gum hrom djơ̆ anih, ngă gal amăng bruă čơkă mă ngăn drăp kah hăng Tơlơi pơtrun pơsit mơng Ping gah pioh pơđĭ kyar. Yua anun, Đồng Nai khom pơplih phrâo kơtang amăng tơlơi pơmin hăng bruă mă, khom jing sa jơlan pơđĭ kyar klă kơ hơdôm anih anom jum dar kah hăng Bình Phước, Bình Thuận, Lâm Đồng pơ ala kơ kơnong kơ hluai tui ƀôn prong Hồ Chí Minh./.

Siu H’ Prăk: Pơblang