VOV4.Jarai - Amăng jơlan hơdră nao čuă gưl Kơnuk kơna pơ̆ Singapore, amăng lơ 25/2, Khua mir sir dêh čar ta ơi Nguyễn Xuân Phúc tŭ jum khua mua sa dua Grŭp bơwih ƀong ba jơlan hlâo dêh čar Singapore amăng bruă apui yua, pơđĭ kyar plơi prong; lŏn drŏn, anom mă yua kual sang măi... Tŭ jum Khua Grŭp Kappel, Khua mir sir dêh čar ơi Nguyễn Xuân Phúc pơsit yôm Grŭp hmâo tuh pơplai ba glăi bôh tŭ yua ƀơi Việt Nam amăng hơdôm hrơi rơgao, rơkâo Grŭp tuh pơplai kơ Việt Nam amăng bruă tuh pơplai apui yua pơkra glăi, apui yua hơdjă, anom mă yua hăng plơi prong phrâo rơgơi. Hơdôm rơwang bruă kiăng hmâo pơkă prong, pơplih phrâo pơčeh phrâo, hmâo tơhnal lar hyu prong ƀơi Việt Nam. Tŭ jum khua mua sa dua Grŭp bơwih ƀong ba jơlan hlâo Singapore, Khua mir sir pơsit: Việt Nam pơtrut pơsur anom bơwih ƀong Singapore tuh pơplai kơ hơdôm bruă anom mă yua, apui yua, măi pơkra pơjing, bruă đang hmua phrâo, hơdră phrâo măi mok, plơi prong hơdeč hmar, bruă bơwih prăk kak, sang prăk. Lăi rơđah, pơtrut tuh pơplai lĕ sa tơlơi đing nao hlâo mơng Việt Nam pơ̆ anăp anai, Khua mir sir rơkâo Khul pơlir hơbit anom bơwih ƀong Singapore jing glông nao rai pơtrut anom bơwih ƀong Singapore tuh pơplai amăng Việt Nam, djru ngă brơi bruă rô nao rai dua bôh dêh čar truh tơhnal dlông hloh./.

Siu H’ Prăk: Pơblang