VOV4.Jarai - Amăng tal nao čuă ƀơi hơdôm tơring čar kual Yŭ Dơnung, mơguah lơ 7/4, Khua mir sir ơi Nguyễn Xuân Phúc hơmâo nao čuă, pơpŭ Tết tui phiăn juăt Chôl Chnăm Thmây ƀơi Sang hră pơtô tơlơi đăo phơ̆t Nam tông Khmer, ƀơi kuận Ô Môn, ƀôn prong Cần Thơ. Sang hră pơtô tơlơi đăo phơ̆t Nam tông Khmer ƀơi ƀôn prong Cần Thơ akŏ pơdong thun 2006 kiăng kơ pơtô pơhrăm brơi ƀing ơi yơng yă phơ̆t djuai ania Khmer dưi hrăm mă ƀăng cử nhân. Dong mơng hrơi akŏ pơdong truh ră anai, Sang hră hơmâo pơtô hrăm 5 tal hăng 200 čô ơi yơng yă phơ̆t dưi mă ƀăng cử nhân tui tơlơi hrăm gah đăo phơ̆t, pơgôp hơmâo lu dong ơi yơng yă phơ̆t thâo rơgơi ƀơi hơdôm sang phơ̆t Khmer kual Yŭ Dơnung. Amăng hơdôm hrơi mơ-ak čơkă Tết tui phiăn juăt Chôl Chnăm Thmây, đĭ pơhiăp ƀơi Sang hră, Khua mir sir ơi Nguyễn Xuân Phúc pơpŭ kơ ƀing ơi yơng yă phơ̆t Nam tông Khmer; laih dong mơ-it tơlơi tơña bla, pơpŭ čơkă tết mơng abih bang mơnuih tui đăo phơ̆t Khmer čơkă tết tui phiăn juăt Chôl Chnăm Thmây thun 2022 bă blai tơlơi mơ-ak, hiam drơi jăn, yâo mơ-ak.

Siu Đoan: Pơblang