Hrơi anai (26/5), tŭ ư hăng tơlơi jak iâu mơng Khua mir sir ơi Lương Cường, Khua mir sir dêh čar Prang ơi Emmanuel Macron hăng bơnai ñu pơphun rai čuă sit nik gưl kơnuk kơna pơ Việt Nam. Anai lĕ dêh čar trun rai čuă blung a amăng tal nao čuă hơdôm boh dêh čar kual Ngŏ dơnung Asia mơng Khua mir sir dêh čar Prang, pơdah tơlơi lăng yôm mơ̆ dêh čar Prang brơi kơ Việt Nam. Tơlơi rô nao rai ngă hrŏm kơplah wah dua boh dêh čar hơmâo găn rơgao lu tơlơi lông đưm hlâo adih hăng glăk tŏ tui pơđĭ kyar kơtang, anăp nao kơñ pơgi mơ-ak klă.

Tal rai čuă anai čang rơmang amra pơtrut ƀiă dong tơlơi rô nao rai ngă hrŏm yôm phăn djop mơta  kơplah wah dêh čar Việt Nam hăng Prang amăng djop mơta bruă, mơng bruă kơđi čar, tơlơi bơwih ƀong huă, wai pơgang rơnuk rơnua truh pơ bruă pơtô pơjuăt, gru grua, kơsem min, boh thâo phrâo hăng hơdôm bruă amăng rŏng lŏn tơnah anun lĕ ayuh hyiăng pơplih sat, wai pơgang rơnuk rơnua amăng kual. Tơlơi anai ăt pơsit tong tơlơi gơgrong jai hrơi yôm phăn mơng Việt Nam amăng kual hăng amăng rŏng lŏn tơnah, pok rai hơdôm tơlơi dưi ngă hrŏm phrâo kơplah wah dua boh dêh čar.