VOV4.Jarai - Čơtlăm lơ 25/4, Khua mir sir dêh čar ta ơi Nguyễn Xuân Phúc, Khua Khul Pơgang lŏn ia – rơnuk rơnua plơi pla nao čuă, mă bruă, pel ĕp tơlơi ngă bruă pơgang lŏn ia ƀơi Quân khu 1. Pơhiăp amăng mông mă bruă, Khua mir sir dêh čar ta ơi Nguyễn Xuân Phúc lăi rơđah, hơdôm hrơi rơgao, Ƀirô pơtrun bruă tơhan Quân khu 1 hmâo ngă klă laih bruă tơhan hăng pơgang lŏn ia amăng kual.

Khua mir sir ơi Nguyễn Xuân Phúc pơsit Grŭp ư-ang Quân khu 1

Biă ñu, Khul ling tơhan Quân khu hmâo gum hrom hăng gưl ping gah, gong gai ƀơi plơi pla gum hrom ba glăi bôh tơhnal bruă pơgang, pơgăn, hơkrŭ pơsir anô̆ răm rai yua kơ ayuh hyiăng ƀu klă ngă, djru pơtlaih, gum ba mơnuih hmâo tơlơi truh... bruă ƀong bôh hơdor kơ pô pla, hrŏ trun rin rơpa, hơdôm bruă mă gum djru khăp păp, bruă pơgang pơgăn klin Covid-19... djru ngă rơđah dong gru rŭp “Ling tơhan Wa Hồ” amăng pran jua mơnuih ƀôn sang. Khua mir sir dêh čar ta pơtă, Khul ling tơhan Quân khu 1 khom pơsit pran hrưn đĭ ngă giong klă hloh djop bruă tơhan, pơgang lŏn ia, prăp lui kơdŏng blah hăng kơdŏng blah pơgang lŏn ia amăng rơwang phrâo, djă pioh dong hơdôm gru grua yôm mơng Chiến khu 1, Liên Khu 1, Liên khu Việt Bắc, Quân khu Việt Bắc đưm hăng Quân khu 1 ră anai./.

Siu H’ Prăk: Pơblang