VOV4.Jarai - Mơguah lơ 12/9, ƀơi Anih mă bruă Khua mir sir dêh čar ơi Nguyễn Xuân Phúc hmâo ƀơk laih Tơlơi pơsit pơđĭ grat mơng Trung tướng đĭ Thượng tướng pioh kơ ơi Phùng Sĩ Tấn, Kơ-iăng Khua pơphô bruă Khul ling tơhan mơnuih ƀôn sang Việt Nam.

Khua mir sir dêh čar ƀơk Tơlơi pơsit pơđĭ grat Thượng tướng kơ Kơ-iăng Khua pơphô bruă Khul ling tơhan mơnuih ƀôn sang Việt Nam

Khua mir sir dêh čar đăo gơnang hăng čang rơmang Thượng tướng Phùng Sĩ Tấn djă kơjăp dong hăng pơđĭ tui pran jua kơđi čar kơjăp phik, ha pran jua hăng tơhnal ba tơbiă, tơlơi pơmin hơkrŭ mơng Ping gah; lăng yôm tơlơi pơmin, bruă gơgrong amăng pơhrăm, pơtô brơi dong pran jua hơkrŭ mơng mơnuih apăn bruă, mơnuih ping gah, mơng mơnuih mă bruă gưl khua, djơ̆ hăng anăn “Ling tơhan Wa Hồ”. Khua mir sir dêh čar rơkâo Thượng tướng Phùng Sĩ Tấn thâo kơjăp tơlơi, hrom hăng khul Khua ƀirô pơphô bruă pơjing Ƀirô pơphô bruă kơjăp kơtang, dưm kơnar hăng bruă mă amăng rơnuk phrâo, ngă tui phiăn juăt ư-ang “ha pran jua, pơphô bruă, abih pran jua, pơseh phrâo, gum hrom hơbit, gum hrom, khut khăt, khom dưi ngă”./.

Siu H’ Prăk: Pơblang