VOV4.Jarai - Čơtlăm lơ 15/2, ƀrô djơ̆ tal hơdor glăi 233 thun blah dưi Ngọc Hồi – Đống Đa (1789 – 2022), 92 thun hrơi pơdŏng Ping gah Cộng sản Việt Nam, tơring čar Bình Định pơphun ngă Lơphet mă yua Pra yang Tây Sơn Tam Kiệt, ring bruă hmâo bôh tŭ yua yôm phăn kơ gru grua, bôh thâo, tơlơi phrâo, pơkĕ hrom hăng anăn păn mơng Ơi Pơtao Quang Trung hăng bruă tơgŭ hơkrŭ Tây Sơn, rơnuk Tây Sơn rơnuč rơnuk thun 18.

Nao pơhmư̆ hmâo Khua mir sir dêh čar ta ơi Nguyễn Xuân Phúc hrom hăng bơnai ñu, khua mua hơdôm ding jum, gơnong bruă dêh čar, tơring čar, ƀôn prong hăng lu mơnuih ƀôn sang tơring čar Bình Định. Pơhiăp amăng mông ngă lơphet, Khua mir sir dêh čar ta lăi nao 5 mơta tơlơi hrăm Quang Trung – Nguyễn Huệ, ơi Pơtao rơgơi kơhnâu, thâo bruă. Anai lĕ hơdôm tơlơi hrăm yôm phăn hăng bruă pơgang lŏn ia, pơgang rơnuk rơnua plơi pla hăng hmâo hơdôm bôh tŭ yua dơlăm kơ pơđĭ kyar bơwih ƀong – mơnuih mơnam kơ Bình Định lăi ha jăn hăng đơ đam dêh čar lăi hrom. Ƀrô djơ̆ tal anai, Khua mir sir dêh čar ta rơkâo Ping gah gong gai hăng mơnuih ƀôn sang tơring čar Bình Định hrom hăng Ding jum bôh thâo, bơkơjăp drơi jăn hăng tuai čuă ngui, hơdôm ƀirô, khul grŭp hmâo bơdjơ̆ nao khom pok pơhai tơpă hăng ba glăi bôh tơhnal jơlan hơdră lŏn ia pơgang hăng ngă tui kơjăp gru grua kual Pra yang Tây Sơn Tam Kiệt, tañ pơdŏng akô̆ bruă pơgang hăng ngă tui kơjăp gru grua lŏn ia pha ra anai./.

Siu H’ Prăk: Pơblang