VOV4.Jarai - Mơguah lơ 28/8, ƀơi plơi prong Sầm Sơn, tơring čar Thanh Hoá, Khua mir sir dêh čar ta ơi Nguyễn Xuân Phúc nao pơhmư̆ mông ngă lơphet pơphun pơdŏng Kual djă pioh gru grua neh wa, mơnuih apăn bruă tơhan, ling tơhan hăng čơđai sang hră kual Dơnung nao hrăm bruă pơ̆ Pơngŏ dêh čar; Mông ngă lơphet lăi pơtŏng Tơlơi pơsit mơng Khua dêh čar tŭ yap plơi prong Sầm Sơn ngă giong bruă pơdŏng plơi pla phrâo; mông ngă lơphet čơkă Miđai mă bruă dăp tal 3 mơng Khua mir sir dêh čar.

Khua mir sir dêh čar ta ơi Nguyễn Xuân Phúc ngă lơphet pơphun pơdŏng ring bruă Kual djă pioh gru grua neh wa, mơnuih apăn bruă, ling tơhan hăng čơđai sang hră kual Dơnung dêh čar nao hrăm bruă pơ̆ kual Pơngŏ dêh čar

Tui hăng tơlơi lăi pơthâo glăi amăng mông ngă lơphet, mơng krah blan 10 thun 1954 truh blan 5 thun 1955, ƀơi să Quảng Tiến, ră anai lĕ phường Quảng Tiến, plơi prong Sầm Sơn, tơring čar Thanh Hoá dưi đăo gơnang jao čơkă jum rơbêh kơ 47.300 čô mơnuih apăn bruă, giăm truh 7.500 čô čơđai sang hră, ƀing hrăm gưl dlông hăng sang anô̆ mơnuih apăn bruă ƀơi kual Dơnung dêh čar nao hrăm. Ră anai, tui hluai tơlơi čang rơmang mơng ƀing apăn bruă hơđăp, ling tơhan, čơđai sang hră nao hrăm bruă, tơring čar Thanh Hóa jao kơ plơi prong Sầm Sơn pơpha lŏn pioh pơdŏng rơwang bruă kual djă pioh hơdor glăi neh wa, mơnuih apăn bruă, ling tơhan hăng čơđai sang hră kual Dơnung dêh čar nao hrăm pơ̆ kual Pơngŏ dêh čar. Pơhiăp amăng mông ngă lơphet, Khua mir sir dêh čar ta ơi Nguyễn Xuân Phúc pơsit yôm tơring čar Thanh Hóa, plơi prong Sầm Sơn hmâo laih tơlơi prăp lui klă hloh kơ bruă pơphun pơdŏng Kual djă hơdor pioh neh wa, mơnuih apăn bruă, ling tơhan hăng čơđai sang hră kual Dơnung dêh čar nao pơhrăm pơ̆ kual Pơngŏ dêh čar, hrom hăng anun rơkâo ngă tui djơ̆ rơnoh bruă kiăng ba mut mă yua amăng tal hơdor glăi 70 thun neh wa, mơnuih apăn bruă tơhan, čơđai sang hră kual Dơnung dêh čar nao pơhrăm pơ̆ kual Pơngŏ dêh čar./.

Siu H’ Prăk: Pơblang