Tơlơi rô nao rai kơđi čar klă hiam kơplah wah dua bôh dêh čar dưi pơsit tơbiă rai mơ̆ng hơdôm tal čuă gưl dlông. Biă ñu, blan 10/2024, Khua git gai Ping gah dêh čar, Khua mir sir dêh čar ta ơi Tô Lâm čuă dêh čar Prang hăng dua bôh dêh čar ba tơbiă Tơlơi lăi pơtŏng hrŏm kơ bruă pơđĭ tơlơi rô nao rai Việt Nam – Prang truh rơnoh gum hrŏm khom ngă abih bang.

Tui anun, Prang jing dêh čar blung a gah Khul pơlir hơbit kual Mi Kô̆ hmâo tơlơi rô nao rai ƀơi rơnoh dlông hloh hăng Việt Nam. Bruă Khua mir sir dêh čar Prang ruah Việt Nam ngă anih rai blung a amăng tal hyu čuă kual mơ̆ng pô pơdah rơđah tơlơi đing nao bruă khom ngă hăng tơhnal yôm phăn dơlăm mơ̆ Prang pioh kơ tơlơi rô nao rai dua bơnah hăng Việt Nam. Tơdơi kơ ngă lơphet čơkă, Khua mir sir ơi Lương Cường hăng Khua mir sir ơi Emmanuel Macron gum hrŏm ba jơlan grŭp khua pơ ala gưl dlông dua boh dêh čar pơphun bơkơtuai pioh kơ hơdôm bruă gum hơgôp ngă dơlăm, ba glăi bôh tơhnal hloh bruă gum hrŏm khom ngă abih bang kơplah wah dua bôh dêh čar./.