Amăng mông tŭ jum, Khua mir sir dêh čar ta ơi Lương Cường pơsit yôm bruă dua bôh dêh čar, dua ping gah lăi pơthâo lu mơta hơhrup kơ tơlơi čang rơmang rơngai, dưi pô, dưm kơnar, ƀu kah akô̆, pơplih phrâo mơnuih mơnam hluai tui tơlơi rô nao rai kơjăp phik, djru nao rai bôh tŭ yua hrŏm, hmâo tơhnal gal pioh pok prong gum hrŏm, pơhrua nao hăng djru tơdruă amăng pơđĭ kyar yua kơ bôh yua kơ mơnuih ƀôn sang rim bôh dêh čar, yua kơ tơlơi rơnuk rơnua, gum hrŏm, pơđĭ kyar ƀơi kual hăng jar kơmar. Khua mir sir dêh čar lăi rơđah, Việt Nam čang rơmang gum hrŏm hăng hơdôm bôh dêh čar gơyut mơ̆ng hlâo ƀơi kual Mỹ Latinh, biă ñu lĕ hăng Chile, dêh čar yôm phăn ba jơlan hlâo, hmâo bruă čung ba bruă mut hrŏm kual, pơlir kual hăng jai hrơi jai djru yôm phăn hloh amăng hơdôm tơlơi đơ đam rŏng lŏn tơnah. Khua mir sir dêh čar čang rơmang pơ̆ anăp anai, dua Ping gah khom kơtưn gum hrŏm kơjăp hăng pok pơhai ba glăi bôh tơhnal pơkôl gum hrŏm kơplah wah dua Ping gah, hrŏm hăng anun hơkrŭ đĭ dong tơlơi đăo kơnang nao rai gưl dlông tui jơlan rô nao rai kơđi čar ngă gru than hăng pơsit jơlan gah pơđĭ kyar tơlơi gum hrŏm abih bang kơplah wah dua bôh dêh čar, biă ñu amăng hơdôm bruă dua bơnah hmâo anô̆ gal.           

Amăng rơwang nao čuă, Khua mir sir dêh čar ta ơi Lương Cường hmâo nao čuă laih sang Rơgom ơi Salvador Allende, sa gơyut prong mơ̆ng Khua mir sir Hồ Chí Minh hăng mơnuih ƀôn sang Việt Nam; dưm guang bơnga hơdor glăi Khua mir sir Hồ Chí Minh ƀơi Chile./.