VOV4.Jarai - Lơ 12/5, Khua mir sir dêh čar ta ơi Nguyễn Xuân Phúc hăng ƀing Khua pơ ala mơnuih ƀôn sang dêh čar mrô 3 ƀôn prong Hồ Chí Minh hmâo bưp laih mơnuih ƀôn sang hơdôm bôh Quận 5, 8 hăng 11. Mơnuih ƀôn sang hơdôm bôh quận čih djă pioh tơlơi gir run mơng Ping gah, Kơnuk kơna hăng gong gai ƀôn prong amăng bruă pơgang, pơgăn klin Covid-19, ngă tui hơdôm hơdră bruă djru hơđong mơnuih mơnam kiăng mơnuih ƀôn sang hơđong tơlơi hơdip mơda.

Mơnuih ƀôh sang djuai ania Khač, Čăm ƀơi hơdôm bôh quận anai brơi thâo, hơdôm hrơi rơgao, gong gai hmâo laih lu hơdră bruă đing nao djuai ania Khač, amăng anun đing nao anih dô̆, pơsur ană bă gơñu hrăm hră... Mơnuih pơ ala kơ mơnuih ƀôn sang čang rơmang hmâo dong lu sang hră pơtô tơlơi Khač kơ ană bă djuai ania Khač; ngă gal brơi, lăng ba bơwih brơi kơ neh wa djuai ania Čăm, biă ñu đah kơmơi, ană bă djuai ania ƀiă hăng čang rơmang hmâo Khua pơ ala mơnuih ƀôn sang pơ ala kơ djuai ania Čăm...

Siu H’ Prăk: Pơblang