VOV4.Jarai - Mơguah lơ 6/6, ƀơi plơi prong Hạ Long, tơring čar Quảng Ninh, Khua mir sir dêh čar ta ơi Nguyễn Xuân Phúc, Khua Grŭp črâo bruă pơdŏng akô̆ bruă git gai Jơnum gum pơhiăp mơng hơdôm Ping gah tơring čar, Ping gah ƀôn prong dêh čar ta (gah kual Pơngŏ dêh čar) hăng hră čih Akô̆ bruă “Bruă pơdŏng hăng ngă giong Kơnuk kơna djơ̆ phiăn djop mơnuih dưm kơnar Việt Nam truh thun 2030, pơsit jơlan gah truh kơ thun 2045”.

Amăng mông Jơnum, hơdôm bôh tơring čar, ƀôn prong amăng kual Pơngŏ dêh čar tŭ ư hrom hăng hơdôm tơlơi pơplih dưi lăi nao amăng Akô̆ bruă, amăng anun hmâo kơtưn pơpha gưl, pơpha tơlơi dưi, hrom hăng anun bă tơbiă kiăng ngă rơđah hloh amăng Akô̆ bruă gah tơlơi rô nao rai kơplah wah Kơnuk kơna hăng gong gai plơi pla hăng jơlan pơsir rơđah kơtưn pơpha gưl, pơpha tơlơi dưi ha amăng plĕ, lăng yôm pran pô gơgrong. Pơhiăp amăng mông klah čun Jơnum, Khua mir sir dêh čar ta ơi Nguyễn Xuân Phúc pơsit yôm hơdôm bôh tơring čar, ƀôn prong kual Pơngŏ dêh čar hmâo laih lu tơlơi gum pơhiăp djơ̆ hăng tŭ ư hrom prong hăng hră čih pơkra Akô̆ bruă, hrom hăng anun rơkâo hơdôm bôh tơring čar, ƀôn prong kơsem min dong Akô̆ bruă kiăng hmâo lu tơlơi gum pơhiăp kơ hră čih pơkra Akô̆ bruă./.

Siu H’ Prăk: Pơblang