VOV4.Jarai - Ƀrô djơ̆ tal hơdor glăi Hrơi pioh kơ čơđai muai Jar kơmar, mơguah lơ 31/5, Khua mir sir dêh čar ta ơi Nguyễn Xuân Phúc nao čuă, pơsur hăng ƀơk gơnam kơ čơđai ƀu klă drơi jăn ƀơi anom rông ba čơđai ƀu klă drơi jăn Hà Nội (tơring kual Chúc Sơn, tơring glông Chương Mỹ).

Mơ-ĭt tơlơi hơ-ư̆č hmưi klă hiam hloh truh hăng ƀing čơđai muai ƀrô djơ̆ Hrơi jar kơmar pioh kơ čơđai muai, Khua mir sir dêh čar ta ơi Nguyễn Xuân Phúc djă pioh, pơsit yôm ƀing nai pơtô čơđai, ƀing apăn bruă, mă bruă pơtô pơhrăm mơng Anom hmâo abih pran jua, gơgrong hăng tơlơi kiăng khăp prong prin, bơwih brơi, rông ba, prăp lui kơ ƀing čơđai ƀu klă drơi jăn bôh thâo hăng tơlơi thâo thăi kơ ƀing čơđai. Pơsit Ping gah, Kơnuk kơna lăng ba na nao ƀing čơđai lăi hrom hăng ƀing čơđai ƀu klă drơi jăn lăi ha jăn, Khua mir sir dêh čar ta lăi rơđah bruă bơwih brơi, pơgang ba čơđai ăt kiăng tơlơi gum hrom, gơgrong, abih pran jua mơng abih bang mơnuih mơnam. Ƀrô djơ̆ tal anai, Khua mir sir dêh čar ta ơi Nguyễn Xuân Phúc ƀơk kơ Anom 100 klăk prăk hăng iâu pơthưr mơnuih mơnam ƀơk kơ Anom măi mok gơnam mă yua pơhrăm kơ čơđai hmâo nua 200 klăk prăk./.

Siu H’ Prăk: Pơblang