VOV4.Jarai - Ƀrô djơ̆ tal hơdor glăi 47 thun Hrơi tlaih rơngai đơ đam kual Dơnung dêh čar, pơlir hơbit lŏn ia, 68 thun hrơi tlaih rơngai Điện Biên Phủ, čơtlăm lơ 27/4, Ding kơna Ding jum kơđi čar, Khua mir sir dêh čar ta ơi Nguyễn Xuân Phúc, Khua Khul pơgang lŏn ia hăng rơnuk rơnua plơi pla dêh čar, Khua Khul ling tơhan mơnuih ƀôn sang dêh čar ta nao čuă, mă bruă hăng Anom wai lăng tơlơi rơnuk rơnua dêh čar.

Gum pơhiăp črâo ba amăng mông mă bruă, Khua mir sir dêh čar ta ơi Nguyễn Xuân Phúc pơsit, amăng bruă kơsung blah hăng tơgŭ hơkrŭ mơng khul ling tơhan hăng mơnuih ƀôn sang ta bơyan bơnga thun 1975, khul pơgang rơnuk rơnua kual dơnung dêh čar, amăng anun hmâo khul pơgang rơnuk rơnua amăng lŏn ia hmâo gum hrom klă amăng hơdôm jơlan kơsung blah mut ƀơi phun mơng ƀing ayăt, blah prai djop anih anom ƀing kơdŏng glăi kơnuk kơna, tañ mă glăi hơdôm anih anom hmâo pơpha, djru ngă prai hĭ jơlan blah hăng glông bruă pơgăn mơng Mi ngụy, gum hrom khul ling tơhan hăng mơnuih ƀôn sang tlaih rơngai đơ đam kual dơnung dêh čar, pơlir hơbit lŏn ia. Lăi nao amăng hơdôm hrơi pơ̆ anăp, Khua mir sir dêh čar ta rơkâo Anom pơgang rơnuk rơnua amăng lŏn ia lăi pơthâo abih dong bruă git gai, črâo ba khut khăt, abih bang mơng Ping gah amăng ngă tui bruă pơgang rơnuk rơnua plơi pla lŏn ia./.

Siu H’ Prăk: Pơblang