VOV4.Jarai - Ƀrô djơ̆ tal prăp lui čơkă Tết tui phiăn juăt Nhâm Dần, Khua mir sir dêh čar ta ơi Nguyễn Xuân Phúc pơ ala kơ khua git gai Ping gah, Kơnuk kơna hmâo nao čuă, ƀơk gơnam tam pơsur pran jua ƀing ơi nai ia jrao ƀơi sa dua bôh sang ia jrao amăng ƀôn prong Đà Nẵng lĕ Sang ia jrao Đà Nẵng hăng Sang ia jrao C Đà Nẵng jing hơdôm sang ia jrao ngă klă bruă pel ĕp pơjrao tơlơi ruă kơ mơnuih ƀôn sang ƀôn prong Đà Nẵng hăng lu tơring čar mơng Nghệ An truh pơ̆ hơdôm bôh tơring čar Dăp Kơdư, hrom hăng anun ăt lĕ hơdôm sang ia jrao ngă klă bruă tŭ jum, pơjrao mơnuih ruă Covid-19. Bơni, djă pioh hơdôm bôh Sang ia jrao kơ hơdôm bôh than dưi ngă, Khua mir sir dêh čar ta ơi Nguyễn Xuân Phúc brơi thâo akă djop 20 hrơi dong lĕ truh Tết tui phiăn juăt, Khua mir sir dêh čar čang rơmang ƀing ơi nai ia jrao ngă tui bôh than dưi ngă, hrưn đĭ pơdŏng Sang ia jrao ƀơi Đà Nẵng jing anih phun bruă ia jrao, mă bruă thâo, djơ̆ hăng tơlơi kiăng pel ĕp pơjrao tơlơi ruă mơnuih ƀôn sang, djru pơgang tơlơi suaih pral, tơlơi yâu mơ-ak mơng mơnuih ƀôn sang ta. Khua mir sir mơ-ĭt tơlơi tơña bla, pơsur pran jua mơng khua git gai Ping gah, Kơnuk kơna truh gơnong bruă ia jrao ƀôn prong Đà Nẵng, biă ñu hơdôm sang ia jrao ƀơi anăp pơjrao brơi kơ mơnuih ƀôn sang, biă ñu hơdôm bôh sang ia jrao hmâo bơdjơ̆ nao pơgang, pơgăn klin Covid-19 phrâo rơgao./.

Siu H’ Prăk: Pơblang