VOV4.Jarai - Mơmot tom brơi (24/2), rơdêh por ba laih Khua mir sir dêh čar ta ơi Nguyễn Xuân Phúc hăng bơnai ñu hrom hăng Grŭp hyu mă bruă gưl Kơnuk kơna Việt Nam hmâo truh laih pơ̆ tơdron rơdêh por jar kơmar Changi, pơphun jơlan hơdră nao čuă dêh čar Singapore. Čơkă Khua mir sir, bơnai Khua mir sir hăng Grŭp ƀơi tơdron rơdêh por, gah Singapore hmâo Khua ding jum pơtom hiăp Vivivan Balakrishnan, Khua pơ ala kơ dêh čar Singapore ƀơi Việt Nam Jaya Ratman. Gah dêh čar Việt Nam hmâo Khua anih jưh pơ ala kơ Việt Nam ƀơi Singapore Mai Phước Dũng, mơnuih apăn bruă hăng mơnuih mă bruă ƀơi Ƀirô anih jưh pơ ala kơ Việt Nam ƀơi Singapore.

Tui jơlan hơdră, amăng tal nao čuă, Khua mir sir dêh čar ta ơi Nguyễn Xuân Phúc amra hmâo hơdôm bruă bơkơtuai hăng Khua mir sir Halimah Yacob, bơkơtuai hăng Khua dêh čar ơi Lý Hiển Long, bơkơtuai hăng Khua git gai wai lăng pơ ala mơnuih ƀôn sang Tan Chuan-Jin. Hơdôm mông bưp gưl dlông anai kiăng pơtrut gum hrom dua bôh dêh čar hmâo kĭ pơkôl laih, bơkơtuai hơdôm jơlan hơdră gum hrom phrâo, ngă dơlăm hloh dong bruă gum hrom kơplah wah Việt Nam – Singapore. Hơdôm ding jum, gơnong bruă, anom bơwih ƀong dua bôh dêh čar amra jao nao rai hơdôm hră pơ-ar gum hrom amăng bruă bơwih ƀong, sĭ mơdrô, pơgang lŏn ia, tơlơi pơhing hăng pôr pơhing, kơsem min hơdră phrâo măi mok...

Siu H’ Prăk: Pơblang