VOV4.Jarai - Čơtlăm lơ 23/1, Khua mir sir dêh čar ta ơi Nguyễn Xuân Phúc hmâo nao čuă, mă bruă hăng Grŭp Khua pơ ala mơnuih ƀôn sang ƀôn prong Hồ Chí Minh. Pơhiăp amăng mông mă bruă, Khua mir sir dêh čar ta ơi Nguyễn Xuân Phúc rơkâo Grŭp Khua pơ ala mơnuih ƀôn sang ƀôn prong ƀom đĭ kơtang tit hơdôm tơlơi ngă bơngot amăng mơnuih mơnam, ngă soh tơlơi phiăn prong ƀơi ƀôn prong, biă ñu hơdôm tơlơi ngă soh hăng pran jua hơdip mơda mơnuih mơnam, taih amang čơđai muai phrâo rơgao.

Khua mir sir dêh čar ta ơi Nguyễn Xuân Phúc mă bruă hăng Grŭp Khua pơ ala mơnuih ƀôn sang ƀôn prong Hồ Chí Minh

Khua mir sir dêh čar ta ăt rơkâo mơn Grŭp Khua pơ ala mơnuih ƀôn sang ƀôn prong lăng ba, lăng tui bruă bơwih ƀong – mơnuih mơnam, ngă giong tơlơi phiăn pơkă, biă ñu tơdơi kơ hơdôm bruă kah hăng sĭ hră pơčruh hrom bơwih ƀong ƀu djơ̆ phiăn, juă nua lŏn phrâo rơgao. Khua mir sir dêh čar ta ăt rơkâo mơn Grŭp Khua pơ ala mơnuih ƀôn sang ƀôn prong kiăo tui kơjăp tơlơi pơtrun, hơdră bruă mơng Ping gah, tơlơi phiăn mơng Kơnuk kơna, lăng yôm bruă gơgrong ƀơi anăp Ping gah, ƀơi anăp mơnuih ƀôn sang; ƀu pơdơi pơđĭ tui bruă kơđi čar; pơtrut ngă giong tơlơi pơkă, tơlơi phiăn kiăng tơlơi phiăn huăi hmâo arăng la mă, ƀu hmâo arăng thâo hluh sôh glăi, ba glăi tŭ yua amăng ngă tui./.

Siu H’ Prăk: Pơblang