VOV4.Jarai - Lơ 5/8, ƀơi Anom mă bruă Khua mir sir, Khua mir sir dêh čar ta ơi Nguyễn Xuân Phúc hmâo tŭ jum laih Khua anih jưh pơ ala kơ Nam Phi Vuyiswa Tulelo, Khua anih jưh pơ ala kơ Saudi Arabia Mahammed Ismaeil A.Dahlwy, Khua anih jưh pơ ala kơ dêh čar Bơl-gum KarlHendrik Margareta Van Den Bossche lăi pơthâo hră mơng lŏn ia.

Tŭ jum Khua anih jưh pơ ala dêh čar Nam Phi, Khua mir sir dêh čar ta ơi Nguyễn Xuân Phúc pơsit, Việt Nam pơsit Nam Phi lĕ “Bơnah gum hrom hăng pơđĭ kyar” yôm phăn ƀơi kual Ơi Jŭ. Khua mir sir čang rơmang dua bơnah gum hrom klă dong hăng dŏng yua tơdruă ƀơi hơdôm mông bơkơtuai lu bơnah. Việt Nam amra dŏng yua Nam Phi kơtưn gum hrom hăng ASEAN; čang rơmang Nam Phi dŏng yua hăng gum hrom kơjăp amăng pơtrut gum hrom Việt Nam hăng kual Ơi Jŭ amăng rơwang bruă Khul pơlir hơbit kual Ơi Jŭ. Tŭ jum Khua anih jưh pơ ala kơ Saudi Arabia, Khua mir sir dêh čar ta ơi Nguyễn Xuân Phúc lăi rơđah hăng Việt Nam, Saudi Arabia lĕ sa amăng hơdôm bơnah gum hrom bơwih ƀong, sĭ mơdrô, tuh pơplai ba jơlan hlâo ƀơi kual Trung Đông hăng čang rơmang Khua anih jưh amra pơtrut bơwih ƀong dua bơnah đĭ dlông hloh dong./.

Siu H’ Prăk: Pơblang