Amăng rơwang nao čuă gưl Kơnuk kơna pơ̆ Hàn Quốc, čơtlăm 4/12, tơdơi kơ truh pơ̆ plơi prong jưh jom Seoul mơtăm, Khua mir sir dêh čar ta ơi Nguyễn Xuân Phúc hmâo hơdôm bruă tŭ jum sa dua khul grŭp giăng mah, gum hrom bơwih ƀong, bôh thâo đưm, bơkơtuai mơnuih ƀôn sang Hàn Quốc hăng Việt Nam hmâo lu tơlơi gum hơgôp klă kơ bruă pơtrut tơlơi rô nao rai dua bôh dêh čar.

Tŭ jum Khul giăng mah Hàn Quốc – Việt Nam (OVIFFA), yua kơ ơi Kim Joon, Khua Khul ba jơlan hlâo, Khua mir sir dêh čar ơi Nguyễn Xuân Phúc lăi rơđah, amăng 30 thun rơgao khă ƀu sui mơn samơ̆ tơlơi rô nao rai dua bôh dêh čar hmâo laih lu bôh than pơhlôm, jing bơnah gum hrom yôm phăn ba jơlan hlâo tơdruă, jing gru gum hrom amăng tơlơi rô nao rai jar kơmar, pơkă gum hrom amăng lu bruă kah hăng tuh pơplai, sĭ mơdrô, tuai čuă ngui, mơnuih mă bruă. Khua mir sir dêh čar ta čang rơmang hăng đăo gơnang khul amra ba jơlan hlâo dong, ngă tui bruă mă phun gah pơtom hiăp mơnuih ƀôn sang; pơtrut tơlơi rô nao rai gum hrom lu mơta; pơtrut pơsur hơdôm bôh anom bơwih ƀong Hàn Quốc kơtưm gum hrom tuh pơplai, sĭ mơdrô hăng Việt Nam; gum hrom djru khul mơnuih 20 rơbăn čô mơnuih Việt Nam ƀơi Hàn Quốc, biă ñu sang anô̆ hmâo bơnai dô̆ rơkơi Hàn Quốc./.