VOV4.Jarai - Ƀơi anih mă bruă Khua mir sir, Khua mir sir dêh čar ta ơi Nguyễn Xuân Phúc hmâo tŭ jum ơi Bounthong Chitmany, Ding kơna Ding jum kơđi čar, Grŭp git gai Ping gah dêh čar Lao, Kơ-iăng Khua mir sir dêh čar Lao hăng grŭp khua pơ ala gưl dlông Ping gah, Kơnuk kơna Lao glăk dô̆ čuă dêh čar Việt Nam. Khua mir sir dêh čar ta ơi Nguyễn Xuân Phúc pơsit, Ping gah, Kơnuk kơna hăng mơnuih ƀôn sang Việt Nam lăng yôm phăn biă, pơsit pran jua djă pioh hăng ƀu pơdơi bư̆ bôr đĭ, pơđĭ kyar tơlơi rô nao rai giăng mah prong prin, gum hrom hơbit pha ra hăng gum hrom abih bang Việt Nam hăng Lao.

Dua gơñu lăi rơđah bôh yôm mơng “Thun gum hrom hơbit giăng mah Việt Nam hăng Lao, Lao hăng Việt Nam 2022” pioh kơ bruă lăi pơhing, pơtô juăt hơdôm gưl mơnuih ƀôn sang, biă ñu amăng rơnuk hlăk ai dua bôh dêh čar, gah bruă pôr pơhing tơlơi rô nao rai pha ra nao hrom, ha pran jua hrom ƀu dưi kah đuăi kơplah Việt Nam hăng Lao. Dua bơnah tŭ ư gir run pơđĭ tui bôh tơhnal gum hrom pơtô juăt, bruă ia jrao, bơkơtuai nao rai gah mơnuih ƀôn sang hăng gum hrom kơplah wah hơdôm plơi pla, gum hrom kơjăp dong, dŏng yua tơdruă amăng hơdôm bruă bơkơtuai jar kơmar./.

Siu H’ Prăk: Pơblang