Khua mir sir dêh čar ta ơi Tô Lâm hơ-ưč hmưi kơ ơi Kohdayar Marri dưi ruah ngă Khua anih jưh pơ ala kơ Pakistan ƀơi Việt Nam. Khua mir sir dêh čar ta lăi rơđah, Việt Nam lăng yôm tơlơi rô nao rai hăng Pakistan, sa bôh dêh čar hmâo anih anom bruă kơđi čar yôm phăn ƀơi kual Ấn Độ Dương – Thái Bình Dương; đăo kơnang Pakistan amra hmâo hơdôm tơlơi gum hơgôp yôm phăn kơ tơlơi rơnuk rơnua, hơđong ƀơi kual.

Tŭ jum Khua anih jưh pơ ala kơ Mozambique Ilundi Dos Santos, Khua mir sir dêh čar ta ơi Tô Lâm pơtŏng sit Việt Nam lăng yôm na nao hăng čang rơmang kơtưn đĭ hloh dong tơlơi giăng mah mơ̆ng hlâo hăng Mozambique, sa amăng hơdôm bơnah gum hrŏm đing nao hlâo mơ̆ng Việt Nam ƀơi kual Ơi Jŭ. Tŭ jum khua anih jưh pơ ala kơ Ngŏ Timor Leste João Pereira, Khua mir sir dêh čar ta ơi Tô Lâm brơi thâo, khă prăk pơhrui glăi mơ̆ng gơnam sĭ mơdrô nao rai dua bơnah ƀu lu, samơ̆ anô̆ gal gum hrŏm kơplah wah dua bơnah dô̆ prong biă, amăng anun hmâo gum hrŏm bruă đang hmua, dăng kông, pơtô pơhrăm, ia jâo ayuh... Khua mir sir dêh čar ta rơkâo Khua anih jưh pơ ala amăng rơwang bruă mơ̆ng pô gum hrŏm klă hăng hơdôm ding jum gơnong bruă, anom bruă mơ̆ng Việt Nam pơtrut đĭ hloh dong tơlơi rô nao rai dua bôh dêh čar./.