Khua mir sir dêh čar ta ơi Võ Văn Thưởng pơdah pran jua mơ-ak tal blung a nao čuă plơi prong jưh jom Vienna, hơtai bôh mơ̆ng dêh čar Áo, anih anom phun bôh thâo mơ̆ng kual Mi Kô̆, anih pơgang ba, djă pioh hơdôm nua yôm bôh thâo mơng kual Mi Kô̆ hăng lu thun dưi ruah lĕ ƀôn prong lăp dô̆ hơdip hloh rŏng lŏn tơnah.

Khua ƀôn prong Viên pơdah pran jua ư-ang čơkă Khua mir sir dêh čar ta ơi Võ Văn Thưởng, Bơnai ñu hăng Grŭp khua pơ ala gưl dlông Việt Nam nao čuă sit nik dêh čar Áo hăng plơi prong jưh jom Viên. Khua ƀôn prong Viên lăi pơthâo hăng Khua mir sir kơ tơlơi pơđĭ kyar bơwih ƀong - mơnuih mơnam mơ̆ng ƀôn prong Viên. Khua ƀôn prong Viên hmâo yap glăi hơdôm bruă Jơnum bôh thâo kơsem min kơ Khua mir sir Hồ Chí Minh, tơlơi gum hrom kơjăp kơplah wah plơi prong jưh jom Viên hăng plơi prong jưh jom Hà Nội, bâo glăi hơdôm tal nao čuă Áo mơng Khua mua gưl dlông Việt Nam. Amăng mông tơlơi rô nao rai kơplah wah Việt Nam hăng Áo glăk pơđĭ kyar klă hiam, ƀôn prong Viên čang rơmang pơtrut kơtang tô nao rai gum hrŏm hăng hơdôm tơring čar ƀôn prong gah Việt Nam, biă ñu tơlơi sĭ mơdrô, tuai čuă ngui, bơkơtuai mơnuih ƀôn sang, bôh thâo đưm - tơlơi adôh suang./.