Khua git gai wai lăng pơ ala mơnuih ƀôn sang gơnong dlông dêh čar Italia hur har čơkă mơ-ak tal nao čuă gưl Kơnuk kơna mơng Khua mir sir dêh čar ta, ơi Võ Văn Thưởng hăng Grŭp khua pơ ala gưl dlông dêh čar Việt Nam; lăi rơđah anai lĕ tơlơi lăi pơthâo nao rai grŭp gưl Khua mua tal blung a kơplah wah dua bôh dêh čar amăng 7 thun rơgao, pơjing gru yôm phăn amăng bruă gum hrŏm dua bơnah. Dua bơnah tŭ ư gum hrom kơjăp phik, dŏng yua tơdruă amăng hơdôm bruă bơkơtuai khua pơ ala mơnuih ƀôn sang kah hăng Khul pơlir hơbit Khua pơ ala mơnuih ƀôn sang rŏng lŏn tơnah (IPU) pioh gum hơgôp kơ tơlơi rơnuk rơnua, gum hrŏm hăng pơđĭ kyar ƀơi kual hăng rŏng lŏn tơnah. Amăng bruă bưp Khua git gai wai lăng pơ ala mơnuih ƀôn sang gơnong yŭ dêh čar Italia, Khua mir sir dêh čar ta, ơi Võ Văn Thưởng rơkâo pơtrut kơtang gum hrŏm kơplah wah hơdôm ƀirô khua pơ ala mơnuih ƀôn sang dua bôh dêh čar, amăng anun hmâo bruă kơtưn bơkơtuai grŭp; dŏng yua bruă mă mơng Việt Nam ngă glông tô nao rai kơplah wah Khua pơ ala mơnuih ƀôn sang dêh čar Italia hăng Khul pơlir hơbit Khua pơ ala mơnuih ƀôn sang ASEAN. Khua git gai wai lăng pơ ala mơnuih ƀôn sang gơnong yŭ dêh čar Italia brơi thâo bruă Khua pơ ala mơnuih ƀôn sang gơnong yŭ Italia pơsit Tơlơi pơkôl pơgang ba tuh pơplai Việt Nam – EU (EVIPA) ƀrô djơ̆ tal nao čuă mơng Khua mir sir dêh čar amra djru ngă gêh gal kơ tơlơi rô nao rai gum hrŏm tuh pơplai kơplah wah dua bơnah.

Ăt amăng tal nao čuă, Khua mir sir ơi Võ Văn Thưởng hơmâo mông bưp khua apăn akŏ ƀôn prong Roma Roberto Gualtieri. Khua mir sir pơdah tơlơi hok mơ-ak lơ̆m nao čuă Roma, ƀôn prong gru grua hing ang, hơmâo lu anŏ hiam phara hăng sang man pơdong pơprong rơhaih hmư̆ hing amăng rŏng lŏn tơnah; rơkâo Khua apăn akŏ ƀôn prong Roma hăng khul khua apăn akŏ ƀôn prong pơtrut kơtang ngă hrŏm kơplah wah kual Lazio laih dong Roma hrŏm hăng Hà Nội, pơgôp ngă dơlăm tui tơlơi ngă hrŏm djop mơta amăng bruă gru grua kiăng kơtưn pơbưp nao rai, lăi pơthâo gru grua rĭm boh dêh čar, rĭm ƀôn prong, mơng anun pơtrut pơbưp nao rai mơnuih ƀon sang hăng thâo hluh tơdruă./.