Amăng mông tŭ jum, Khua mir sir dêh čar ta ơi Võ Văn Thưởng pơsit yôm Khua pơ ala hơdôm hrơi rơgao hmâo ngă klă laih bruă mă hăng hơdôm ƀirô apăn bruă mơng Việt Nam; hyu čuă lu anih anom kiăng pơtrut tơlơi gum hrom kơplah wah dua bôh dêh čar jai hrơi nao dơlăm hăng ba glăi bôh tơhnal.

Khua anih jưh pơtŏng sit, Mi amra gum hrom kơjăp hăng Việt Nam amăng hơkrŭ pơsir anô̆ pioh glăi mơng blah ngă đưm, amăng anun hmâo pơsir tơlơi bơdjơ̆ nao yua kơ jrao dioxin pioh glăi, pel ĕp bôh ƀôm bôh min hăng hyu ĕp mơnuih rơngiă tơdơi kơ blah ngă. Kiăng ngă dơlăm hloh dong tơlơi rô nao rai kơplah wah Mi hăng Việt Nam pơ̆ anăp anai, Khua mir sir dêh čar ta rơkâo dua bơnah kơtưn đĭ hloh dong hơdôm bruă bơkơtuai khul grŭp, pơbưp gưl dlông; pơtrut lu hloh dong hơdôm jơlan hơdră, rơwang bruă gum hrom dua bơnah amăng djop bruă, ba glăi bôh tŭ yua sit nik kơ dua bôh dêh čar, hrom hăng anun djru klă kơ tơlơi rơnuk rơnua, hơđong, gum hrom hăng pơđĭ kyar ƀơi kual hăng ƀơi rŏng lŏn tơnah./.