Amăng mông tŭ jum, Khua mir sir dêh čar ta hăng Khua dêh čar Australia pơdah pran jua djơ̆ pran biă ƀơi anăp tơlơi pơđĭ kyar kơtang mơng tơlơi rô nao rai dua bôh dêh čar tơdơi kơ 50 thun pơdŏng bruă pơtom hiăp, ba glăi bôh tŭ yua sit nik kơ mơnuih ƀôn sang dua bôh dêh čar hăng djru klă kơ tơlơi rơnuk rơnua, hơđong amăng kual hăng rŏng lŏn tơnah; tŭ ư hrom kơtưn đĭ hloh dong pran đăo gơnang kơđi čar kơplah wah dua bôh dêh čar, lăng anai lĕ gru than yôm phăn kơ bruă pơđĭ kyar tơlơi rô nao rai dua bôh dêh čar truh tơhnal phrâo hloh pơ̆ anăp anai.

Lăi pơthâo nao rai kơ hơdôm tơlơi ƀơi kual hăng jar kơmar, dua bơnah tŭ ư dŏng yua tơdruă hăng gum hrom kơjăp amăng hơdôm mông bơkơtuai ƀơi kual hăng jar kơmar, biă ñu lĕ Sang gum hơbit djop dêh čar, APEC, ASEAN hăng hơdôm hơdră yua kơ ASEAN ba jơlan. Khua dêh čar Australia pơtŏng sit glăi tơlơi pơmin mơng Australia kơ dŏng yua pơpŭ tơlơi phiăn jar kơmar ƀơi kual hăng pơsir tơlơi bơrơsua ƀơi Ia Rơsĭ Ngŏ hăng hơdôm jơlan mơ-ak klă, lăp djơ̆ hăng tơlơi phiăn jar kơmar, biă ñu lĕ UNCLOS 1982./.