VOV4.Jarai - Amăng rơwang mơng hơdôm hrơi akô̆ bơyan bơnga Nhâm Dần, hơdor glăi 92 thun pơdŏng Ping gah, Khua mir sir dêh čar ta ơi Nguyễn Xuân Phúc nao pơhmư̆ hăng đĭ pơhiăp amăng Hrơi jơnum ngui “Gru bơyan bơnga ƀơi djop plơi pla amăng lŏn ia” thun 2022. Amăng mông đĭ pơhiăp, Khua mir sir dêh čar ta, ơi Nguyễn Xuân Phúc bâo glăi tơlơi pơtă pơtăn mơng Khua mir sir Hồ Chí Minh: “Neh wa djuai ania Yuan ƀudah Thổ, Mường ƀudah Mán, Jarai ƀudah Êđê, Hơdang ƀudah Bahnar hăng djop djuai ania ƀiă pơkon, leng kơ ană amôn Việt Nam, leng kơ adơi ayong sa kian pruăi. Ƀing ta djai hơdip hmâo hrom, tơnap tap hmâo hrom, trơi pơđao hmâo hrom” hăng pơsit: Bôh thâo hling hlang mơng djuai ania Việt Nam dưi pơjing mơng 54 djuai ania adơi ayong gum hrom hơbit, pơkĕ hrom tơdruă. Anun lĕ sa bôh thâo lu mơta, hmâo tơlơi tŭ ư hrom prong gah bôh pơhiăp, jing sa kông ngăn yôm phăn mơng djuai ania ta. Pơpŭ sa djuai ania, blung hlâo lĕ pơpŭ bôh thâo mơng djuai ania anun. Hơdră bruă djuai ania mơng Ping gah hmâo pơjing tơlơi gal kơ bruă rơnăk djă pioh hăng pơlar anô̆ pha ra amăng gru grua mơng rim djuai ania, hrom hăng anun ngă brơi bôh thâo mơng djop djuai ania mut nao hrom pơjing rai bôh thâo Việt Nam kơjăp phik hăng ngă bơngač hyu./.

Siu H’ Prăk: Pơblang