VOV4.Jarai - Čơtlăm lơ 22/8 ƀơi ƀirô mă bruă Khua mir sir dêh čar, Khua mir sir dêh čar ta ơi Nguyễn Xuân Phúc hmâo tŭ jum Khua Anom pel ĕp kơđi tơlơi mơnuih ƀôn sang dêh čar Lao Xay-xạ-nạ Khốt-phu-thon hăng grŭp hyu čuă hăng mă bruă ƀơi Việt Nam.

Khua mir sir dêh čar ta ơi Nguyễn Xuân Phúc tŭ jum Khua Anom pel ĕp kơđi tơlơi mơnuih ƀôn sang dêh čar Lao

Amăng mông tŭ jum, Khua mir sir dêh čar ta ơi Nguyễn Xuân Phúc nao lăi pơthâo hơ-ư̆č hmưi hăng bơni ơi Xay-xạ-nạ Khốt-phu-thon Khua Anom pel ĕp kơđi tơlơi mơnuih ƀôn sang dêh čar Lao hăng Grŭp khua pơ ala rai čuă, mă bruă, nao pơhmư̆ Jơnum Anom pel ĕp kơđi tơlơi mơnuih ƀôn sang hơdôm bôh tơring čar hmâo hrom ha mơguai lŏn ia Việt Nam hăng Lao tal 7 hăng hơdôm bruă mă čơkă mơ-ak Thun gum hrom hơbit giăng mah Việt Nam – Lao, Lao – Việt Nam thun 2022. Pơsit yôm dua Anom pel ĕp kơđi tơlơi mơnuih ƀôn sang dua bôh dêh čar hmâo tơlơi rô nao rai, gum hrom klă hiam, Khua mir sir dêh čar lăi lĕ, anai jing tơlơi djru dua bơnah lăi pơthâo tơlơi pơhing hăng tơlơi găn rơgao amăng hơdôm bruă mă tơlơi phiăn hrom hăng anun pơsit: Việt Nam amra gir run kơ Anom pel ĕp kơđi tơlơi mơnuih ƀôn sang dêh čar Lao kơ djop mơta; amra djru prăk hrăm hră kơ Anom pel ĕp kơđi tơlơi mơnuih apăn bruă, mơnuih mă bruă amăng Anom pel ĕp kơđi tơlơi mơnuih ƀôn sang dêh čar Lao hrăm hră ƀơi Việt Nam./.

Siu H’ Prăk: Pơblang