Ƀơi Sang ia jrao prong tơring glông Thanh Liêm, Khua mir sir nao čuă hơdră čơkă jum mơnuih ruă pel ĕp, pơjrao tơlơi ruă tui hră căn cước pơ ala kơ hră pơgang gah ia jrao, sa hơdră ba glăi bôh tŭ yua lu kơ mơnuih ruă, biă ñu hrŏ trun hrơi mông kơ wot ơi ia jrao hăng mơnuih ruă. Ƀrô djơ̆ tal hơdor glăi Hrơi pioh kơ ơi nai ia jrao Việt Nam, pơ ala kơ Khua git gai Ping gah, Kơnuk kơna, Khua mir sir dêh čar ta Võ Văn Thưởng mơ-ĭt tơlơi hơ-ưč hmưi klă hiam hloh, tơlơi pơpŭ, pran jua kiăng khăp yôm phăn truh hăng ƀing ơi nai ia jrao tơring glông Thanh Liêm hăng tơring čar Hà Nam. Khua mir sir dêh čar ta pơsit yôm mơ̆ng sang ia jrao să truh pơ̆ tơring glông hmâo ngă klă laih hơdôm jơlan hơdră pơkă mơ̆ng lŏn ia kơ bruă ia jrao, tlâ̆o pơgang hlôm hlâo tơlơi ruă, bơwih brơi tơlơi suaih pral blung a, lăi pơthâo tơlơi suaih pral kơ hlăk ai, pel ĕp ruah mă hăng bơwih brơi mơnuih ruă lok nao lok rai. Khua mir sir lăi lĕ, tơdah bruă ia jrao mă bruă ba glăi bôh tơhnal amra djru pơjing pơgi kơdih anai kơjăp phik kơ tơring glông hăng lŏn ia.

            Khua mir sir rơkâo hơdôm gưl Ping gah, Gong gai hăng ƀirô bơdjơ̆ nao mơ̆ng tơring čar Hà Nam, tơring glông Thanh Liêm lăng ba dong pioh tuh pơplai hloh dong kơ bruă ia jrao tơring glông tui jơlan gah tuh pơplai pơlar mơnuih mă bruă, mơ̆ng anun kơjăp tui bruă pel ĕp, pơjrao tơlơi ruă ƀơi sang ia jrao; tuh pơplai dong kơ gơnam tam mă yua anih anom pơjrao tơlơi ruă tui jơlan phrâo, lăng juăt, mơtah, agaih hiam./.