VOV4.Jarai - Čơtlăm lơ 9/8, ƀơi Anih mă bruă Khua mir sir dêh čar, Khua mir sir dêh čar ta ơi Nguyễn Xuân Phúc hmâo tŭ jum Đại tướng Hun Manet, Kơ-iăng Khua pơtrun bruă tơhan Khul ling tơhan dêh čar Kur, Ding kơna Grŭp apăn bruă Ping gah mơnuih ƀôn sang dêh čar Kur glăk dô̆ čuă dêh čar Việt Nam, Khua mir sir dêh čar ta ơi Nguyễn Xuân Phúc čơkă mơ-ak Đại tướng Hun Manet rai čuă, mă bruă ƀơi dêh čar Việt Nam; đăo gơnang tal rai čuă hmâo lu bôh tŭ yua anai amra djru yôm phăn truh kih mơng “Thun giăng mah Việt Nam – Kur 2022”.

Khua mir sir dêh čar tŭ jum Kơ-iăng Khua pơtrun bruă tơhan Khul ling tơhan dêh čar Kur

Lăi rơđah Việt Nam hăng Kur lĕ dua bôh dêh čar jê̆ giăm hmâo tơlơi rô nao rai giăng mah mơng hlâo, Khua mir sir dêh čar ơi Nguyễn Xuân Phúc čang rơmang Đại tướng Hun Manet, hăng hơdôm bruă apăn yôm phăn ră anai ăt kah hăng pơ̆ anăp anai, amra djru klă dong kơ bruă djă pioh, pơlar tơlơi rô nao rai jê̆ giăm klă hiam, giăng mah mơng hlâo, gum hrom abih bang, kơjăp sui thun kơplah wah dua bôh dêh čar./.

Siu H’ Prăk: Pơblang