VOV4.Jarai - Mơguah lơ 17/3, ƀơi ƀon prong Hồ Chí Minh, Khua mir sir ơi Nguyễn Xuân Phúc git gai jơnum gưl dêh čar tal 3 kơ bruă akŏ pơdong kơnuk kơna hơdip tui tơlơi phiăn. Mông jơnum hơmâo anăn “Hơdôm bruă phrâo, pơplih phrâo hloh amăng bruă akŏ pơdong hăng ngă pơgiong Kơnuk kơna tui tơlơi phiăn xã hội chủ nghĩa Việt Nam truh thun 2030, lăng nao pơ anăp truh thun 2045”. Tơdơi kơ ha hrơi pơhmư̆, pơgôp hiăp, bơkơtuai, Khua mir sir ơi Nguyễn Xuân Phúc lăi, boh than mơng 2 wơ̆t Jơnum gah bruă anai yôm biă mă, pơsit tơlơi dưi lơ̆m pok pơhai ngă bruă sit nik hăng lu tơlơi hmư̆ hing prong, yôm biă kiăng ƀing ta ruah mă, ba pơmut amăng Kơčăo bruă hăng Tơlơi pơtrun pơƀuh kơ Ping gah Dêh čar.

Khua mir sir ơi Nguyễn Xuân Phúc

Khua mir sir lăi, kơčăo bruă “Hơdră akŏ pơdong hăng ngă pơgiong Kơnuk  kơna hơdip tui tơlơi phiăn xã hội chủ nghĩa Việt Nam truh thun 2030, lăng nao pơ anăp 2045” hơmâo anŏ yôm biă mă. Anai lĕ hrơi mông gêh gal, dưi pơplih klă amăng bruă kơđi čar, djơ̆ hăng tơlơi kiăng đĭ kyar bơwih ƀong huă tui jơlan xã hội chủ nghĩa hăng mut hrŏm jar kmar.

Siu H’Mai: Pơblang