VOV4.Jarai-Ăt amăng hơdră mă bruă hăng Ding jum, anom bruă pioh mă tơlơi pơgôp hiăp ngă giong kơčăo bruă anăn Bruă man pơdong hăng ngă giong hơbô̆ kơnuk kơna tơlơi dưi hăng tơlơi phiăn lŏn ia XHCN Việt Nam truh thun 2030, anăp nao pơ thun 2045, lơ 7/7, Khua mir sir ơi Nguyễn Xuân Phúc hơmâo git gai jơnum hăng Ping gah anom bruă kông an dêh čar, khua mua ping gah Ding jum Tơlơi phiăn. Ƀơi mông mă bruă, lu tơlơi pơgôp hiăp, pơčrông sai lăi nao bruă mă mơ̆ng Khul git gai čih pơkra kơčăo bruă anai lu bruă, tŭ yua yôm, hơmâo tơlơi pơtô djơ̆ rơ-ua hăng ngă tui sit nik, laih dơ̆ng, pơgôp hiăp kơ pơphun bruă mă hăng bruă mă mơ̆ng anom bruă kông an, anom bruă tơlơi phiăn.

Amăng anun lu tơlơi pơgôp hiăp lăi nao kơ anŏ pơblih phrâo hăng bruă mă hơduah ĕp kơnôl kơđi ngă soh, anom bruă arăng jao ngă tui kơđi giong phat djơ̆ hăng tơlơi gêh găl ƀơi Việt Nam, pơhlôm, pơgang tơlơi dưi ană mơnuih amăng bruă mă man pơdong lŏn ia, mut phung hăng jar kmar. Pơhiăp git gai jơnum, hăng hơdôm bruă lăi pơthâo amăng kơčăo bruă pơdjơ̆ nao gah anom bruă tơhan kông an, anom bruă tơlơi phiăn hăng lu bruă pơkŏn, Khua mir sir rơkâo kơ Khul git gai pơđing hmư̆ tơlơi pơgôp hiăp djop mong jơnum, mơ̆ng anun čih pơtum glăi lăi pơthâo Khul khua mua git gai sem lăng ruah mă hơdră ngă tui djơ̆ găl.

Nay Jek: Pơblang