VOV4.Jarai - Tlam lơ 18/4, ƀơi Ƀirô Ping gah, pơphun Jơnum tal dua mơng Khul git gai akŏ bruă pơjing Kơnuk kơna phiah phiăn tui tơlơi git gai mơng Ding kơna Ding jum kơđi čar, Khua mir sir ơi Nguyễn Xuân Phúc, Khua khul git gai akŏ bruă. Đĭ pơhiăp amăng mông jơnum, pơl ala Khul git gai, Khua mir sir ơi Nguyễn Xuân Phúc brơi thâo, ƀing ding kơna amăng Anom dăp hơdră, ƀing rơgơi kơhnâo hơmâo mông mă bruă gir run, gơgrong hloh, bơkơtuai, pơlăi nao rai tơpă sit; sem lăng glăi hơdôm hră pơ-ar kơ hơdôm akŏ bruă prong mơng 27 pok hră pơ-ar, 3 črăn tơlơi čih bơkơtuai dêh čar; pơdah abih tơlơi thâo thăi, tơlơi găn rơgao amăng bruă čih pơkra, dăp hơdră kiăng kơ hơmâo akŏ bruă tal blung a, mơ-it nao Jơnum Khul git gai tal anai.

Khua mir sir lăng yôm, hăng hơdôm tơlơi tŭ ư hrŏm tui tơlơi pơmĭn, tơlơi kiăng, anŏ yôm phun amăng akŏ bruă “Hơdră pơjing hăng pơgiong Kơnuk kơna tui phiah phiăn xã hội chủ nghĩa Việt Nam truh thun 2030, anăp nao truh thun 2045” wŏt tơlơi pơgôp, bruă sit nik hăng hơdôm tơlơi pơplih phrâo amăng pơđĭ kyar hơđong kjăp lŏn ia tui tơlơi git gai mơng Ping gah; hluai tui phiah phiăn hăng tui bruă kơđi čar kiăng pơsit tong hơdôm bruă kiăng ngă lơ̆m pơjing akŏ bruă.

Siu Đoan: Pơblang