VOV4.Jarai-Tơdơi kơ grup čưng boh lông U 23 Việt Nam ƀong sa asar hăng grup čưng boh lông U23 Thai Lan, dưi pơgang pioh pô dưi hloh amăng bruă pơplông čưng boh lông ƀơi kual ASEAN iâu klah čun SEA Games 31, Khua mir sir ơi Nguyễn Xuân Phúc, Khua dêh čar ơi Phạm Minh Chính, Khua git gai pơ ala mơnuih ƀôn sang dêh čar ơi Vương Đình Huệ hăng ding kơna ding jum kơđi čar, khua djru bruă git gai ping gah dêh čar ơi Võ Văn Thưởng nao ĕp lăng tơl tơdron čưng boh lông laih anun jao miđai ia kông kơ ƀing pơhrăm čưng boh lông hăng ƀing čưng boh lông U23 dêh čar Indonesia; miđai ia prăk kơ grup čưng boh lông U23 Thai Lan; laih anun jao miđai ia mah kơ nai pơhrăm čưng boh lông U23 Việt Nam, laih anun ƀing khua mua nai pơtô pơhrăm čưng boh lông Việt Nam hăngjao miđai ia mah kơ abih bang ƀing tơdăm tơhan pơtŭ mah, jing ƀing čưng boh lông dêh čar ta pơplông abih pran jua ba glăi tơlơi hing ang kơ lŏn ia, kơ mơnuih hor lăng čưng boh lông amăng dêh čar.

Pơ ala kơ ping gah, kơnuk kơna hăng mơnuih hor lăng čưng boh lông, ơi Nguyễn Xuân Phúc Khua mir sir pơpŭ hăng bơni kơ ơi Park Hang-seo laih anun abih bang ƀing čưng boh lông U23 Việt Nam hơmâo ngă sa bruă lăp hơdor pioh ƀơi SEA Games 31. Khua dêh čar ơi Phạm Minh Chính hơmâo mơ-it hră bơni hơ-ơč kơ ƀing nai pơtô pơhrăm grup čưng boh lông dêh čar Việt Nam, tơdơi kơ hơmâo mă pri miđai ia mah ƀơi SEA Games 31. Boh tơhnal ba glăi tŭ yua prong hloh hrơi anai, hrom hăng miđai ia mah mơ̆ng grup čưng boh lông đah kơmơi Việt Nam ăt hơmâo miđai ia mah mơ̆n, ƀuh rơđah kơnuih, tơlơi kơtang amăng bruă čưng boh lông Việt Nam lăi pha, pơrơguăt drơi jăn Việt Nam lăi hrom amăng kual hăng hrưn đĭ tui amăng rŏng lŏn tơnah.

Nay Jek: Pơblang