VOV4.Jarai-Ƀrô hơdor glăi 97 thun hrơi Hră pơhing phrâo hơkrŭ Việt Nam, tlam mơmŏt lơ 20/6, ƀơi ƀôn prong Hồ Chí Minh, khua mua ƀôn prong jơnum bưp ƀô̆ mơta ƀing čih tơlơi pơhing. Nao jơnum hrom hăng pơhiăp mông bưp ƀô̆ mơta anun, hơmâo khua mir sir ơi Nguyễn Xuân Phúc mơ-it nao kơ abih bang mơnuih čih tơlơi pơhing phrâo, ƀing čih dăp glăi jơlan hơdră, ƀing mă rup phim video, mă rup hră pơhing phrâo ƀơi ƀôn prong Hồ Chí Minh hăng abih bang ƀing čih tơlơi pơhing amăng dêh čar hăng tơlơi khăp pơpŭ hiam klă hloh. Khua mir sir ơi Nguyễn Xuân Phúc lăi pơtong, kơnang kơ tơlơi pơhing ta pô čih, hră pơhing phrâo lăi pơthâo hlâo tañ pioh kơ djop sang bruă, mơnuih ngă khua hăng apăn bruă kơnuk kơna ƀu khin ngă soh glăi, ƀu khin ƀong kông ngăn prăk kăk, phăk phai.

Biă mă ñu hăng tơlơi gơgrong ba krăo lăng, drơ̆ng glăi pơtruh brơi tơlơi pơhing mơnuih mơnam, hră pơhing phrâo djru hrom akŏ pơdong '‘Kơnuk kơna mơ̆ng mơnuih ƀôn sang, yua mơnuih ƀôn sang kơ mơnuih ƀôn sang'’.

Pơñă glăi črăn ƀôn prong Hồ Chí Minh hăng djop tơring čar gah dơnung tŭ tơlơi răm ƀăm yua klin kheng Covid 19 ngă, Khua mir sir ơi Nguyễn Xuân Phúc bơni kơ ƀing čih tơlơi pơhing ƀu kơdun yua kơ tơnap tap, hrơi mlam dŏ mă bruă djru hrom bong glăi hăng klin kheng, mơ̆ng anun djru mơnuih ƀôn sang amăng dêh čar thâo hluh tơlơi tơnap tap, tơlơi mă bruă khin hơtai mơ̆ng Ping gah, gong gai kơnuk kơna djop tơring čar găn rơgao tal klin kheng, ƀrư̆ tơbiă đuăi mơ̆ng tơlơi tơnap rŭ glăi bơwih ƀong huă kơ mơnuih mơnam.

Nay Jek: Pơblang