VOV4.Jarai - Lơ 6/2, ƀơi rơwang Kual tuai čuă ngui gru grua bôh thâo lŏn ia Pra yang pơtao Hùng, plơi prong Việt Trì – tơring čar Phú Thọ, Khua mir sir dêh čar ta ơi Nguyễn Xuân Phúc pơphun Tết pla kyâu hơdor kơ Wa Hồ. Jơlan hơdră yua kơ Ding jum đang hmua hăng pơđĭ kyar ƀôn lan dêh čar ta hăng Jơnum min mơnuih ƀôn sang tơring čar Phú Thọ gum hrom pơphun. Pơhiăp amăng mông ngă lơphet, Khua mir sir dêh čar ta ơi Nguyễn Xuân Phúc iâu pơthưr rim mơnuih, rim sang, rim ƀirô, khul grŭp gum hơgôp rơđah, sit nik, ngă tui Jơlan hơdră pla sa klai phun kyâu pơtâo amăng rơwang mơng thun 2021-2025 – Yua kơ sa Việt Nam mơtah, djru pơdŏng lŏn ia ta mơtah na nao hăng kơjăp phik. Khua mir sir dêh čar ta ăt rơkâo mơn tơring čar Phú Thọ pla ƀiă biă mă ñu 2 klăk phun kyâu pơtâo amăng thun anai kah hăng kơčăo bruă ba tơbiă. Amăng anun thun 2020, Khua dêh čar hmâo Tơlơi črâo ba laih mrô 45 rơkâo pơphun bruă Tết pla phun kyâu hăng kơtưn pơgang pơđĭ kyar dlai klô kiăng ngă tui jơlan hơdră pla 1 klai phun kyâu pơtâo “Yua kơ sa Việt Nam mơtah”. Thun 2021 Khua dêh čar ta pơsit Akô̆ bruă mrô 524 hăng tơhnal pơkă truh abih thun 2025, đơ đam dêh čar pla hmâo 1 klai phun kyâu pơtâo./.

Siu H’ Prăk: Pơblang