Ƀơi mông jơnum, Khua mir sir lăi pơtong, anai lĕ mông pioh kơ sa wơ̆t dơ̆ng kiăng pơtong rơđah, hơdôm boh tơhnal prong prin pran jua pơgôp hrŏm mơ̆ng djop hnơr khua mua, ling tơhan pơgang guai dêh čar laih anun tơlơi gơgrong kơtang mơ̆ng mơnuih ƀôn sang amăng bruă djru pơgang ba tơlơi dưi ngă pô kơ lŏn ia, pơgang rơnuk rơnua hơđong ƀơi guai dêh čar; thâo pơgôp tong ten pran jua djop djuai ania amăng bruă man pơdong hăng pơgang Lŏn ia Việt Nam mơnuih mơnam ngă pô bơkơnar.

Pơ ala kơ khua mua ping gah, kơnuk kơna, Khua mir sir ơi Võ Văn Thưởng hơmâo jao Miđai Blah dưi mrô dua hăng tơlơi pơhiăp bơni hơ-ơč hiam klă hloh kơ abih bang djop gưl rơnuk khua mua, ling tơhan pơgang guai dêh čar. Khua mir sir pơtrun hiăp kơ tơhan pơgang guai dêh čar, djop gưl, djop anom bruă, biă mă ñu djop tơring čar hơmâo guai hăng dêh čar tač rơngiao, khom thâo tong ten, đing lăng hlâo tơlơi pơhing, boh nik ñu amăng bruă pơtom hiăp kiăng tañ hơdai gum hrŏm ngă tui hơdră pơhlôm hlâo, pơsir djơ̆ găl hơdôm tơlơi či hơmâo; pơtrut bruă mă pơtô pơblang, pơtô hrăm, pơđĭ tui tơlơi thâo hluh, bruă ngă glăm ba pơgang tơlơi dưi ngă pô lŏn ia, tơlơi rơnuk rơnua ƀơi guai dêh čar, boh nik ñu ƀơi djop jơlan guai dêh čar ƀơi lŏn ia, amăng plao ia rơsĭ hăng ƀơi djop anih dêh čar ngă pô.