VOV4.Jarai - Mơguah lơ 9/6, Binh đoàn 11 (Ding jum ling tơhan) pơphun mông ngă lơphet hơdor glăi 40 thun hrơi gru grua Binh đoàn (11/6/1982 - 11/6/2022) hăng čơkă mă Miđai wai pơgang lŏn ia mrô III. Amăng mông ngă lơphet, pơ ala brơi khua mua Ping gah hăng Kơnuk kơna, Khua mir sir dêh čar jao Miđai wai pơgang lŏn ia mrô III kơ Binh đoàn 11.

Đĭ pơhiăp git gai amăng mông ngă lơphet, Khua mir sir pơsit tong Binh đoàn 11hơmâo pơdah pran kơtang amăng djop mơta mơng pơjing, man pơkra hơdôm ring bruă akŏ phun mơng Ding jum ling tơhan; anai lĕ akŏ amăng bruă man pơdong amăng khul ling tơhan, amăng anun yôm hloh lĕ ring bruă Ƀirô Khua pơ ala mơnuih ƀon sang dêh čar arăng lăng yôm biă mă, ba glăi tơlơi đăo gơnang, kơdrưh mơng lŏn ia, Khul ling tơhan hăng pơtrut pran gum pơgôp giang mah kơplah wah Việt Nam - Lao. Kơ bruă jao pơ anăp anai, Khua mir sir rơkâo Binh đoàn 11 (Ding jum ling tơhan) tŏ tui ngă klă dong bruă mă, bruă jao mơng Khul ling tơhan, tŏ ngă tui pran kơtang mơng anom bơwih ƀong sĭ mơdrô amăng khul ling tơhan lơ̆m ngă tui bruă pơlir hơbit bơwih ƀong huă hăng hơkrŭ wai pơgang rơnuk rơnua.

Siu Đoan: Pơblang