VOV4.Jarai-Ăt amăng hơdră nao mă bruă pơ hơdôm tơring čar gah dơnung, mơguah lơ 19/1, ƀơi tơring čar Tiền Giang, Khua mir sir ơi Nguyễn Xuân Phúc nao jơnum brơi rơdêh dưi nao rai ƀơi jơlan đuăi hmar Trung Lương-Mỹ Thuận, bơwih brơi kơ hrơi têt Nhâm Dần 2022. Jơlan rơdêh đuăi hmar Trung Lương-Mỹ Thuận anai yôm biă mă kơ bruă pơtruh nao rai sĭ mơdrô pơdŭ pơgiăng gơnam amăng kual ia krông Cửu Long hăng ƀôn prong HCM laih anun hơdôm kual bơwih ƀong huă phun gah kual Dơnung.

Đĭ pơhiăp ƀơi mông jơnum, Khua mir sir ơi Nguyễn Xuân Phúc lăi rơđah, jơlan glông nao rai lĕ sa bruă yôm biă mă hăng kual ia krông Cửu Long, laih anun kơčăo bruă anai čuk pơkra kaih giong lu thun rơgao ngă kơ mơnuih ƀôn sang hil biă mă. Yua kơ anun kơnuk kơna hơmâo lu hơdră pơsir, pơtrun hiăp khut khăt hloh brơi pơsir hĭ tơlơi dŏ gun kơƀah prăk, ngă bruă kaih, mơnuih ngă bruă….Khua mir sir ăt lăng yôm Group Đèo Cả git gai khut khăt pơkra jơlan, mă bruă hrơi mlam ƀu pơdơi ôh, pơsir tañ hơdôm tơlơi aka ƀu găl, wơ̆t amăng mông klin kheng hai kiăng tañ rơdêh dưi nao rai.

Nay Jek: Pơblang