VOV4.Jarai - Mơguah lơ 10/6, ƀơi tơring čar Quảng Nam, Khua mir sir ơi Nguyễn Xuân Phúc git gai jơnum pơgôp hiăp hăng kơčăo bruă “Hơdră akŏ pơdong hăng ngă giong kơnuk kơna hơdip tui tơlơi phiăn xã hội chủ nghĩa Việt Nam truh thun 2030, lăng nao truh pơ thun 2045” mă tơlơi pơgôp hiăp mơng hơdôm ping gah tơring čar, ƀon prong kual Tong krah - Dap Kơdư. Anai jing mông jơnum tal 2 tơdơi kơ mông jơnum tal 1 ƀơi Quảng Ninh rơgao mơng anai hơdôm hrơi. Pơhiăp ƀơi mông jơnum, Khua mir sir ơi Nguyễn Xuân Phúc pơsit, hơdôm Ping gah tơring čar, ƀon prong hơmâo lăi nao hơdôm tơlơi tŭ yua, gơgrong bruă, tơpă ară gơñăm nao tơlơi kiăng amăng bruă akŏ pơdong hăng ngă giong kơnuk kơna tui phiăn Xã hội chủ nghĩa Việt Nam. Hơdôm tơlơi pơplih prong amăng kơčăo bruă hơmâo pơsit yôm phun, djơ̆ akŏ, hơdôm bruă kiăng ngă, hơdră ngă bruă hơmâo lăi nao rơđah, djơ̆ hăng tơlơi kiăng ră anai. Khua mir sir lăi, hơdôm tơlơi pơgôp hiăp pơdah rai pran jua hơkrŭ, tơlơi čang rơmang dưi gum pơgôp amăng bruă pơplih phrâo, pơđĭ kyar lŏn ia. Anai jing tơlơi pơtrut pran jua kiăng khua mua Ping gah, Kơnuk kơna git gai, črâo bruă, ngă truh kih bruă akŏ pơdong hăng ngă giong Kơnuk kơna tui tơlơi phiăn XHCN mơng Mơnuih ƀon sang, yua Mơnuih ƀon sang, yua Ping gah git gai.

Siu H’Mai: Pơblang